Hmeichhiate'n kum khat atan Rs. 15,000 an dawng ziah ang : Chhattisgarh CM

Assembly inthlan hmachhawn mek, Chhattisgarh chief minister, Bhupesh Baghel chuan Congress-in Chhattisgarh-a sorkarna an siam leh a nih chuan kum tina hmeichhiate ṭanpuina tur, Rs. 15,000 an sem tur thu a sawi.

CM Baghel thusawi hi BJP-in inthlan thutiama an neih zinga mi, hmeichhe pasal nei tawhte tana ṭanpuina Rs. 12,000 sem an tum beih letna anga ngaih a ni. Baghel chuan,"Vawiin anga Diwali hun ropui takah hian, Chhattisgarh Mahtari leh Maa Lakshmi ji te malsawmna dawng chungin hmeichhiate tihchakna tura hmanraw ṭangkai tak tur kan duang a ni," tiin a sawi. Baghel hian 'Chhasttisgarh Gruha Lakshmi Yojana' chu a tlangzarh thu puangin, he hmalakna hnuaiah hian an sorkar leh chuan hmeichhiate tan kum tin Rs. 15,000 an bank account-ah thun ṭhin a ni ang, a ti.

Chhattisgarh assembly-ah hian seat 90 awmin, November 7 khan inthlan thawh khatna chu seat 20-ah neih a ni a, inthlan thawh hnihna hi November 17-ah seat 70 atan neih leh a ni ang.