Bihar sorkarin nawrh huaihawt lo turin zirtirtu rawih tharte chah

Bihar sorkar chuan zirtirtu rawih tharte chu education department hmalakna dodal leh kalh zawnga thiltihnaa inrawlh lo tura hrilhin, hriat chhuah an nih chuan na taka action lak a nih bakah, pawl an din a nih chuan ban an nih tur thu a hriattir.

Bihar education department chuan Bihar Public Service Commission (BPSC) exam paltlang zirtirtu nuai 1.2 vel an lak belh thu sawiin, heng zirtirtu tharte hian November 2 khan 'provisional appointment letter' an dawn vek thu an sawi a ni. Zirtirtute posting hi la tihfel a ni lo a, zirtir hna pawh an la ṭan lo bawk.

Hetih lai hian mi ṭhenkhatin pawl dinin, education department hmalakna sawisel leh dodal zawngin an che nia hriat a nih thu leh, chu chu Bihar government employees Conduct rules-1976 kalh a nih thu sawiin, dan kalha chete chu na taka hrem an nih theih thu hi department thuchhuah chuan a tarlang. "BPSC hnuaia zirtirtu lakte chu pawl din emaw, pawla inhnamhnawihna an neih phal a ni lo. Zirtirtu ṭhenkhat chu Code of conduct of Bihar school teachers rules, 2023 paragraph 7 of section 17 hnuaiah an chet dan hi thlithlai a ni a, Bihar government code of conduct 1976 hian zirtirtu zawng zawng a huam a ni. Dan kalha chetna, pawl an dina hruaitute hnen aṭangin insawi fiahna nghah mek a ni a, hengho rawihna hi tihtawp leh theih vek a ni," tiin thuchhuahah chuan an tarlang bawk.

TET primary teachers association, Raju Singh chuan education department thiltih dan chu a thlawp thu sawiin,"Zirtirtu lak tharte chu an appoinment letter pawh pek lailawk ang chauh an la nih avangin pawl lo din emaw, pawla tel pawh an tan thil thiang a ni rih lo. An probation hun a zawh hnuah chiah an tel thei a ni. Mi tu pawh hian kan ngaihdan sawi leh tihlan theihna dan chu kan nei teh meuh mai a, mahse, chu chu dan awm tho pelin ni suh se," tiin a sawi ve bawk. BPSC hian August 24 leh 25 khan exam a buatsaih a, he exam buatsaihah hian zirtirtu hna ruak nuai 1.70 awmah exam patlang hi mi nuai 1.20 an awm a ni.