PM Modi-a'n sipaite Diwali hmanpui

Prime minister Narendra Modi chuan Himachal Pradesh Lepcha-a sipaite Diwali a hmanpui a, an huaisenna chu chhuanawm a tih thu a sawi. Modi hian sipaite nena Diwali an hmang lai leh ei tur a pe laite X-ah a post a ni.

Modi hian Diwali hmannaah hian thu sawiin,"India hi ralthuam leh venhimna lama khawvel huapa theihna nei ṭha leh lian ber ni turin a ṭhang mek a, kan sipaite chakna leh ropuina pawh a ṭhang ve zel a ni. Khawvel ram dangte'n India laka an beiseina pawh a sang tawh hle. Hetiang hunah tak hian kan ramrite hi ven ṭhat an ngai zual a, ram chhung a ralmuan theih nan nangni hian hna pawimawh tak in thawk a ni," tiin, sipaite chu an chhungte hlatah hunpui hmangin awm mah se, ram venhimna hna an thawh kawngah ramin an lakah bat tam tak a neih thu a sawi. Modi chuan sipaite awmna chu temple aia a danglam tam loh thu leh, India-in zalenna a hmuh aṭanga vawiin thlenga ram a la him chhan chu sipaite vang a nih thu a sawi bawk.

Kum 2014-a Prime Minister a nih aṭangin Modi hian Diwali hmangin sipai hmunpui hrang hrang a kal kual tawh ṭhin a, 2014 khan Siachen Glacier tlawhin, 2015 khan Punjab-a war memorial-ah Diwali a lo hmang tawh bawk. 2016 khan China ramria Indo-Tibetan Border Police (ITBP) te kawmin Diwali a hmang a, 2017-ah North Kashmir-a Gurez sector tlawh bawkin, 2018 Diwali-ah Harsil, Uttarakhand a tlawh bawk. PM hian 2019, 2020, 2021 leh 2021-ah te pawh Rajouri, Longewala, Nowshera leh Kargil-ah te kalin sipaite bulah Diwali hi a hmang a ni.