Tamil Nadu khaw 7-ah savate tan puak thei chi hal lo

Ram puma Diwali lawm nana halpuah leh halmawi chi hrang hrang hal a nih laiin, Tanil Nadu-a Erode district-a khaw pasarihte chuan ri tel loa eng nen chauha Diwali lawm thlangin, hei hi an khaw bul hnai bird sanctuary-a sava chengte ralmuan leh himna atana ti an ni.

Heng khuate hi bird sanctuary awmna, Erode aṭanga km 10-a hlaa awm, Vadamugam Vellode chhehvela awmte an ni a, sanctuary-ah hian sava awm sa-te bakah, October leh January thla inkarah an tui awp keu turin hmun dang aṭangin pem sava an lut khawm ṭhin bawk. Helai khaw pasarihte hian an halpuah hal ri leh halmawi avanga savate an ṭit loh nan leh, savate an thih loh nan hetiang hian kum 22 chhung chu Diwali lawmna hi puak thei chi hal loin an lo kalpui tawh.

Khaw mite chuan Diwali lai chuan an fate chu thawmhnaw thar an leisak mai thu sawiin, a eng thei chi chiah an hal ṭhin thu leh, a puak ri chi chu an hal ngai loh thu an sawi. Heng khuate hi Sellappampalayam te, Vadamugam vellode te, Semmandampalayam te, Karukkankattu Valasu te, Pungampadi leh khaw dang pahnih te an ni.