Sri Lanka-in India mi sangha mantu 42 an mante chhuah

Tamil Nadu sangha mantu 42 te chu Sri Lanka chuan tan in aṭanga a chhuah thu leh, ni li hnuah Tamil Nadu an rawn thlen theih tur thu sangha mantu pawl hruaitu, P. Jesu Raja chuan a sawi. October thla chhung khan Sri Lanka Navy te chuan sangha mantu 64 an man hman a, lawng 10 an mansak tel bawk.

Sangha mantute man an nih avangin an pawl hian October 14 aṭang khan nawrh an lo huaihawt tawh a, mahse, sorkar laipui leh state sorkarte'n hma la tura an intiam avangin an nawrh hi an titawp leh a ni. Sangha mantu pawl hruaitu ṭhenkhatte chuan Jesu Raja ho hian, DMK MP, TR Baalu te nen New Delhi-ah External Affairs Ministry hotute hmuin, Sri Lanka Navy mi mante chhuah zalen an nih theihna tura hma la turin an ngen.

P. Jesu Raja chuan sangha mantu 42 te chhuah an nih theihna tur atan hian Sri Lanka court chuan November 9 khan hearing a nei a, November 15 hian hearing neih leh tur niin, hetah hian midang 24 te chungthu ngaihtuah a nih tur thu leh, chhuah zalen an nih ve ngei a beisei thu a sawi a ni. Raja chuan sangha mantute chhuah ni mah se an lawngte erawh hrensak an la a ti bawk.