Uttarakhand : Congress party aṭangin CM hlui fapa hnawtchhuak

Uttarakhand-a rorellai, Congress party MLA pakua-te sorkar laka an hel avanga party chhunga buaina chuan zual lam a la pan zel a, nimin khan MLA helte hotu ber, Chief Minister hlui Vijay Bahuguna fapa, Saket leh Anil Gupta-te chu party aṭangin kum ruk chhung atan an hnawtchhuak.

Congress party chuan CM hlui fapa hi party laka hel tura MLA dangte fuihpawrh leh, party kalh zawnga cheah puhin a hnawt-chhuak a ni. Hemi hma hian state chhung district pakua-a an party unit-te chu an ṭhiat vek bawk.

Hetihlai hian Congress MLA hel pakuate chuan BJP MLA-te nen President Pranab Mukherjee hmuin, Uttarakhand-a Chief Mi-nister Harish Rawat-a kaihhruai sorkar chuan thlawptu a ngah tawk tawh loh avangin ṭhiat turin ngen an tum tih an sawi. MLA hel zinga mi, Harwak Singh Rawat chuan Governor KK Paul hnenah lehkha thawnin, sorkar fiah a nih theih nan vawiin hian assembly special session ko turin a ngen bawk. Governor Paul hian CM Rawat chu a kaihhruai sorkarin thlawptu a ngah tawk tih finfiah turin March 28 thleng hun a lo pe tawh a ni.

Hetihlai hian CM Rawat chu an party hotu lute nen an state-a an buaina tawh mek chungchang sawiho turin Delhi pan a tum a, mahse party vice president Rahul Gandhi chuan kalchhuak lo a, buaina chinfel dan tur buaipui zawk turin a ti a ni.

Uttarakhand-ah hian rorellai Congresr party-in assembly seat 70 awmah MLA 36 a nei a, party dang leh indepedent MLA parukin an thlawp bawk. Mahse Congress MLA pakua-te chu Chief Minister lakah hian helin, MLA 27 nei BJP thlawp an tum nia sawi a ni.

CM Harish Rawat chuan a kaihhruai sorkar chuan thlawptu member a ngah tawk tih a la finfiah ngei dwn tih a sawi a, majority a nei tih a finfiah theih loh chuan, a ban tur thu a sawi. 'House-ah majority kan nei tih kan lantir ang. Kei chu democracy kalphung zawmtu ka ni a, majority ka nei pha lo tih fiah a nih rualin banna ka thehlut nghal ang. BJP hian kum 2019-a inthlan nei tur thlir ranin kan sorkar hi tihbuai tumin an bei mek a ni" a ti.

Congress party vice president Rahul Gandhi pawhin Uttarakhand -a politics buaina thleng mekah BJP chu a lo mawhpuh tawh a, Prime Minister Narendra Modi-a kaihhruaina hnuaiah BJP chuan sorkar paihthlak tuma a theih ang anga beih chu kalphung-ah a nei tawh a ni, a ti. 'Bihar inthlana an chak loh hnuah, BJP chuan thu dik tawk lo leh sum hmanga mipui thlanchhuah sorkar tihbuai leh paihthlak tumin an che a ni. Hei hi democracy leh kan ram Constitution beihna a ni. Arunachal Pradesh-ah an che tawh a, tunah Uttarakhand-ah an che leh a, hei hi Modi-a kaihhruai BJP hmel dik tak chu a ni. Congress party chuan mipuite duhthlanna tungdin tumin kan bei zel dawn a ni" a ti.