India-in UN-a Israel chet dan demna resolution a thlawp

UN general assembly draft resolution siam, Palestinian ram awp chhunga Israel-in chenna a buatsaih demna; 'Israeli settlements in the Occupied Palestinian Territory' chu India chuan a thlawp zawngin vote a thlak. Draft resolution hi Special Political and Decolonisation Committee chuan pawmin, a thlawp lamah hian vote 145 a tla a, a thlawp lo pasarih leh kal lo 18 an awm.

Resolution pawm takah hian Palestinian ram awp chhung, East Jerusalem leh Syrian Golan huam chhunga Israel-in kut a thawhna leh chenna tur a buatsaih an demna tarlan a ni. "Palestinian ram awp chhung leh Syrian Golan huam chhunga Israel-in chenna a buatsaiha a luah chu phal loh leh remna neihna tur kawng daltu a nih bakah, ram hmasawnna tur kawng hrang hrang tiṭhuanawptu a ni," tih tarlangin, Israel-in heng hmuna kut a thlakna zawng zawng chu tawpsan tura an duh thu an sawi.

He resolution thlawp lo lama vote-tu ramte chu; Canada, Hungary, Israel, Marshal Islands, Federated States of Micronesia, Nauru leh United States te an ni a, resolution pawm zawnga vote ram 145 zingah hian India bakah, Bangladesh, Bhutan , China, France, Japan, Malaysia, Russia, leh UK te pawh an tel. India hian UN general assembly neih mekah Israel leh Hamas indona kara remna leh muanna puan a, ṭanpuina leh chhawmdawlna buatsaihna tur resolution siamah vote a thlak tawh lo a ni.