India aṭanga US-a zirlai kal 35%-in an pung
US-ah lehkha zir tura kal tam lamah India chuan China a lehpel a, kum 2009-2010 hnua graduate zirlai, US-a lehkha zir zawm tura kal zat chu 35%-a pungin, academic year 2022-2023 chhungin zirlai 268,923 zet an kal. US sorkara Bureau of Educational and Cultural Affairs nena thawk dun, Institute of International Education (IIE)-in an tihchhuah, Open Doors Report (ODR) tarlan danin, India aṭanga US-a lehkha zir zawm tura kal hi kum thum chhung chu a zawnin an pung chho tawh a ni.
US-a India embassy thuchhuah chuan, India aṭanga graduate, US-a zir zawm tura kal zat chu nikum aia 63% zeta an pun thu sawiin, zirlai 165,936 an awm mek niin an tarlang a, undergraduate zirlai pawh 16%-in an pung bawk. India zirlaite chu ram dang aṭanga US-a lehkha zir chhunzawm tura kal zawng zawng aṭanga 25% zet an tlin phak thu an tarlang. "India-a US embassy leh consulate-te chuan zirlaite visa hunpui kan tih mai, July-August 2023 chhung khan student visa dil an tam ber ṭum an tawng. India ram hmun hrang hranga consular officer- te chuan F.M. leh J category-ah te visa 95,269 an pe chhuak a ni. Hei hi 2022-a hetiang hun chhung vek nena khaikhinin, 18% zetin a pung a ni," tiin an tarlang.
India-a US ambassador, Eric Garcetti chuan ram pahnihte inkarah inzawmna ṭha an siam thu sawiin,"India ram zirna inte'n an zirlaite tana khawvel huap zirna sulsutu dinhmun an ding thei hi kan lawm hle a, hma hruaitu dinhmunah hian ding chhunzawm se kan duh. Hetih rual hian hmeichhe zirlai pawh mipa zirlai tluk zeta tam awm se tih hi kan duh bawk a, US zirlaite pawhin India dinhmun hre tur hian lo kal ve zel se tih hi kan beisei a ni," tiin a sawi.
ODR-a tarlan a nih danin zirlai 69,062 te chuan Optional Practical Training (OPT) thlangin, hei hi an zirlai nena inkaihhnawih leh hna awmzia hre thiam tura hna nghet lo thawh pah phalna a ni. Tuna ODR tihchhuah hi International Education Week (IEW) hawnna a ni a, IEW hi ram pakhat aṭanga ram danga lehkha zir tura zirlai inkal tawn theih pawimawhna leh hlutna lawmna atana buatsaih a ni.