ECI-in AAP leh Priyanka Gandhi-te notice pe

Election Commission of India (ECI) chuan prime minister Narendra Modi chungchanga thu dik tawk lo sawia puh, Congress hruaitu Priyanka Gandhi Vadra chu notice a pe. Ani bakah hian ECI hian Aam Admi Party (AAP) hruaitu, Arvind Kejriwal pawh notice pein, AAP social media kaltlanga PM Modi sawi chhiatna an post chungchang sawi fiah turin an hriattir.

Priyanka Gandhi hian Madhya Pradesh-a inthlan rally neihnaah PM Modi chu Public Sector Undertaking (PSU) hnuaia sorkar enkawl, kawlphetha lam siamna, BHEL chu a ṭhian industrialist te hnena pe vek angin a sawi a ni. Hemi chungchangah hian BJP chuan hekna siamin, Priyanka Gandhi-i'n PSU te mimal tana pea a sawi chu dik lo leh fiahna awm lo ta ni, an ti. Madhya Pradesh poll panel pawhin Priyanka hi a thusawi chungchang sawi fiah turin an lo hriattir tawh bawk.

Hetih lai hian AAP pawhin X-ah PM Modi leh industrialist ṭhenkhatte lanna video an post a, hei hi BJP chuan Election Commission (EC)-ah hekin, AAP thil post leh an post chungchang sawinaa PM Modi hmingchhiat theihna awm chu thil ṭha lo tak a nih theih thu an sawi. EC chuan,"Aam Admi Party national convener hi an social media kaltlanga party pakhat leh party pakhat star campaigner chungchanga thu dik tawk lo sawi leh theh darh nia hriat avangin insawi fiah tura hriattir a ni. Inthlan a awm dawn laia hetiang thil a thlen avang hian dan anga model code of conduct hmang leh inthlan kaihhnawih dan hmanga hrem a nih loh chhan tur ṭha tak a neih a ngai ang," tiin an notice-ah an tarlang.

AAP laka complaint theh luttu zingah hian Union Minister leh BJP national media in-charge ni bawk, Hardeep Singh Puri bakah, Rajya Sabha member, Anil Baluni leh party hruaitu, Om Prathak te an tel a ni.