Ei leh in tur thi tawh zuarte hremna tur rawtna siam

BJP MP, Brijlal kaihhruai Parliamentary standing committee on Home Affairs chuan ei leh in tur thi tawh zuarte hremna, a tlem berah thla ruk tan ina tan leh Rs. 25,000 chawitir ni turin rawtna an siam. Panel hian rawtna an siam hi Rajya Sabha-ah an theh lut tawh a ni.

Tun dinhmunah ei leh in tur thi tawh zuarte hremna chu thla ruk chin tan leh Rs. 1,000 thleng chawi tura hrem theih chauh an ni. Ei tur a ṭhat hun chhung pel tawh ei hian hriselna dinhmun thui taka a khawihchhiat theih avangin, hetiang zuartute hremna nen hian a inhen loa hriat avangin parliamentary panel hian hremna na zawk pekna turin rawtna thar siam an ni. Parliamentary panel chuan,"Ei leh in tur thi tawh hian mimal hriselna mai ni loin vantlang mipui zawng zawng hriselna a nghawng thei tih ngaihtuah chungin, heng ei leh in tur him tawk lo zuartute hremna hi na zawk siam a ṭul a ni," an ti.

Panel chuan criminal law thar, Bharatiya Nyaya Sanhita (BNS) hnuaia hremna chi khat; vantlang hnathawh (community service) chu thil ṭha tak a nih thu sawiin, ei leh in tur thi tawh zuartute hremna atan pawh hian hman nghal theih a nih thu an sawi bawk. "Tan in dinhmun ṭhat lohna hmunah chuan heng vangtlang hnathawh hian a chhawk hle dawn a, an hremna ai khan vantlang tan thil ṭha tiin an thawk dawn tihna a ni," a ti. Hetih lai hian BNS hnuaia community service hian eng chin nge a huam a, eng hna nge an thawh dawn tih leh, eng tia rei tur nge tihte a sawi chian loh avangin parliamentary panel chuan dan anga an hman dawn chuan BNS hnuaia vantlang hnathawh hremna atan inkaihhruaina chu uluk zawka zir leh siam ṭhat ngai lai siam ṭhat phawt a ṭul thu an sawi bawk.