PM-in PM-KISAN pawisa pe chhuak

Prime minister Narendra Modi chuan loneitute ṭanpuina tura duan, Pradhan Mantri Kisan Samman Nidhi (PM-KISAN) 15th instalment chu nimin khan Jharkhand-ah a pe chhuak ṭan. PM-in PM-KISAN scheme hnuaia pawisa a pek chhuah tur thu hi Union Agriculture Ministry chuan 'Janjatiya Gaurav Diwas' puala ti an nih thu an puang.

PM-KISAN 15th instalment kaltlang hian loneitu vbc. 8 chuangte tan Rs. 2,000 ṭheuha pek turin Rs. vbc. 18,000 ruahman a nih thu agriculture ministry chuan a sawi. Sorkar laipui tarlan danin kumin July thlenga he scheme hnuaia inziak lutte chu Madhya Pradesh-ah tam berin, mi 83,70,263 an ni a, Rajasthan-ah mi 63,98,381, Chhattisgarh-ah mi 31,15,499 leh Telangana aṭangin mi 92,520 an tling bawk. Agriculture ministry chuan PM-KISAN scheme chu kalpui a nih ṭan tirh aṭanga loneitute pawisa dawn chu Rs. vbc nuai 2.80 a tlin tawh thu a sawi bawk. "PM-KISAN scheme hi khawvel huap pawha a dawngtu turte hnena pek nghalna scheme lian ber a ni. Sorkar laipui hmalakna a nih angin India sorkarin loneitute tana ngaihtuahna a senna leh a ngaihsakna lantirna a ni a, vawiin thlenga chhunzawm a la ni thei hi a lawmawm hle. He scheme hmang hian loneitu inziak lut zawng zawngte hnenah kum tina Rs. 6,000 pek ṭhin a ni a, hei hi anmahni account ngeiah thun niin, thla li danah pek ziah an ni," tiin Agriculture Ministry chuan an tarlang.

Hetih lai hian Congress chuan inthlan dawn hnaiha inthlang tur state-ah ngei PM-KISAN hminga pawisa sem a ni chu model code of conduct bawhchhiatna a nih thu an sawi. Congress hruaitu, Jairam Ramesh chuan tuna instalment an pek chhuah ang hi kum dang; 2022, 2021 leh 220-ah chuan October leh August-ah an pek chhuah thu sawiin, 15th instalment bik tihkhawtlai a ni chu inthlan dawn hnaih a nih avanga tikhawtlai luiah BJP chu a puh.