Chhattisgarh leh Madhya Pradesh Assembly inthlan nei dawn

Chhattisgarh assembly inthlan thawh hnihna leh, Madhya Pradesh assembly inthlan chu vawiin hian neih a ni dawn.

CHHATTISGARH :

Chhattisgarh assembly inthlan thawh hnihna chu vawiinah neih a ni dawn a, seat 70- inthlan neih turah candidate 958 an awm.

Chhattisgarh state assembly-ah hian seat 90 awmin, November 7-a inthlan thawh khatna chu seat 20-ah neih a lo ni tawh a ni. Inthlan thawh hnihnaah hian hmeichhe candidate 130 awmin, heng zinga 39 hi Independent candidate an ni a, party angin Congress chuan hmeichhe candidate ngah berin, an candidate 70 zingah hmeichhe 15 an tel.

Candidate thubuai nei : Chhattisgarh election watch leh Association for Democratic Reforms (ADR) zir chianna aṭanga a lan danin Chhattisgarh inthlan thawh hnihnaa candidate 958 aṭanga mi 100 te hian thubuai an nei a, hei hi 10% a tling pha. Heng zinga 56 (6%) te hian thubuai rip (serious case) an nei bawk. Party anga lakin INC candidate 70 zinga 13-in thubuai neiin an tam ber a, BJP-in dawtin, candidate 70 zinga 12-in thubuai an nei a, Janta Congress Chhattisgarh (J) candidate 62 zinga 11 leh, AAP candidate 44 zinga 12-te chu thubuai nei lai an ni ve bawk.

Candidate-te hausakna : Candidate 958 hausakna lak rual hi Rs. vbc 2 a ni a, INC candidate-te chu a hausa ber berte niin, INC candidate 70 zinga 60-te chu crorepati an ni a, BJP candidate 70 aṭanga 57 leh Janta Congress Chhattisgarh (J) candidate 62 zinga 26-te chu crorepati an ni bawk. Rs. vbc 5 leh a aia tam nei candidate 74 awmin hei hi candidate zawng zawng aṭanga 8% a ni. Hetih lai hian Rs. vbc 2 aṭanga vbc 5 nei hi candidate 87 (9%) awmin, nuai 10 nei tling lo candidate hi 369 (39%) an awm bawk. Candidate zinga hausa ber chu Ambikapur constituency-a ding tur, Congress candidate TS Baba niin, a hausakna belh khawm hi Rs. vbc 400 aia tam a ni. Candidate rethei ber hi pathum awmin, Bhatgaon, Beltara leh Kharsia aṭanga chuh tur; Kalawati Sarthi (Independent), Gautam Prasad Sahu (Independent) leh Yashwant Kumar Nishad (Johar Chhattisgarh Party) te chuan engmah an nei lo niin an affidavit theh luhah tarlan a ni.

Zirna leh kum dinhmun : Chhattisgarh inthlan thawh hnihnaa candidate-te affidavit theh luh aṭanga a lan danin candidate 499 (52%) te chu pawl 5 aṭanga 12 inkar thiamna nei an ni a, mi 405 (42%) te chu graduate leh a chung lam thiamna nei an ni thung, diploma nei hi mi 21 an awm a ni. Candidate 19-te chu ziak leh chhiar thiam tawp an ni a, candidate 6 chu ziak leh chhiar thiam lo an ni bawk. Candidate zingah hian kum 80 chung lam pakhat a awm a, kum 20 aṭanga 40 inkar candidate hi 355 awmin, kum 41 aṭanga 60 inkar hi mi 487 awm bawkin, kum 61 aṭanga 80 inkar hi mi 109 an awm thung.

Raipur city west constituency-ah candidate tam berin he seat hi mi 26-in an inchuh dawn a, candidate tlemna ber Balod district-a awm, Dondi Lohara (ST) constituency chu mi 4-in an chuh dawn a ni. Red alert constituency an tih, constituency pakhata thubuai nei candidate pathum aia tam awmna hi constituency 16 awmin, Korba constituency aṭanga chuh tur candidate 19 zinga 6-te chuan thubuai an nei a ni.

MADHYA PRADESH :

Election Com­mission of India-in a ruahman angin vawiin hian Madhya Pradesh chuan assembly inthlan an hmachhawn dawn a, assembly seat 230 awmin candidate 2,534-in an chuh dawn a ni.

Inthlan neih turah hian national party candidate 711 awmin, state party candidate 103 leh registered unrecognized party hrang hrang candidate 553 an awm bawk a, independent-a chuh tur hi candidate 1,167 an awm bawk.

Candidate-te hausakna : Madhya Pradesh assembly inthlan chuh tur candidate 2,534 zinga 727-te hi crorepati an ni a, hei hi candidate zawng zawng aṭanga 29% a tling pha a, inthlan hnuhnung ber, 2018-ah khan 24% a ni thung. Party anga crorepati candidate ngah ber hi BJP niin, candidate 230 aṭanga 200 te chu crorepati an ni. Congress-in dawtin, crorepati candidate hi 196 an nei a, BSP candidate 181 zinga 54, AAP candidate 66 aṭanga 39-te chu crorepati an ni. Independent candidate 1167 zinga 149-te chu crorepati an ni bawk. Candidate 2,534 aṭanga 265-te chu Rs. vbc 5 leh a chung lam hausakna nei niin Association for Democratic Reforms (ADR) chuan an tarlang a, Rs. vbc 2 aṭanga vbc 5 nei hi 250 awm bawkin, nuai 10 aia tlem nei hi mi 830 an awm. Candidate zinga hausa ber chu Ratlam city constituency-a ding tur, BJP candidate Chetanya Kasyap niin, a hausakna belh khawm hi Rs. vbc 200 chuang a ni. Hetih lai hian candidate engmah nei lo hi mi 12 zet an awm thung.

Candidate-te zirna leh kum : Madhya Pradesh assembly inthlan atan hian candidate 6 tih lohte chuan an affidavit-ah educational qualification an tarlang a, candidate 1,233-te chu pawl 5 aṭanga pawl 12 inkar zir zo niin, hei hi 49% an ni a, candidate 1105-te chu graduate leh a chung lam zir zo ni bawkin, mi 28-te chu diploma nei an ni. Ziak leh chhiar thiam lo hi 28 awmin; lehkha zir lem lo, ziak leh chhiar thiam mi 134 an awm bawk.

Kum 80 tling tawh candidate hi mi pahnih an awm a, kum 41 aṭanga 60 inkar tam berin, candidate 1,252 an awm a, hei hi candidate zawng zawng aṭanga 49% a ni. Kum 25 aṭanga 40 inkar hi 952 an awm a, kum 61 aṭanga 80 inkar hi candidate 328 an awm bawk. Tun ṭum inthlanah hian assembly inthlan chuh thei tura danin kum hniam thei ber a ruat, kum 25 tling chiah chiah hi mi 18 an awm.

Hmeichhe candidate neih dan : Madhya Pradesh-ah hian kum 2023 assembly inthlan atana candidate 2,534 aṭangin hmeichhe candidate 253 an awm a, hei hi 10% chauh a ni pha a ni. Hmeichhe candidate 87 te hi independent candidate niin, party zingah Congress chuan hmeichhe candidate ngah berin candidate 30 an nei. BJP chuan hmeichhe candidate 27 nei ve bawkin, BSP-in 21 an nei bawk.

Madhya Pradesh assembly-ah hian Satna constituency aṭanga chuh tum an tam ber a, candidate 124 an awm a, Bhind constituency-in dawtin candidate 107 an awm bawk. Hetih lai hian candidate tlemna ber chu Alirajpur constituency niin, candidate 13 an awm ve. Thubuai nei candidate pathum aia tam awmna, red alert constituency hi 79 awmin, Katni district-a Murwara constituency-ah hian thubuai nei candidate pasarih an ding dawn a ni.