Covid-19 kai enkawl dam 71.61% an tling tawh
India ramah Covid-19 kai nitinin nasa takin pung mah se enkawl dam pawh an tam tawh hle a, nimin thleng khan hri kai zinga 71.61% chu an dam leh tawh a ni.
Ministry of Health and Family Welfare-in nimina report an tihchhuahah hri kai hmuh chhuah thar 63,490 an awm leh a, hei nen hian hri kai 25,89,682 an awm tawh. Darkar 24 chhungin dama puan mi 53,322 an awm leh a, hri kai tawh zinga 18,62,258 lai chu enkawl dam tawh an ni bawk.
Covid-19 vanga thi darkar 24 chhungin 944 lai an awm leh a, nimin thleng khan mi 49,980-in thihpui tawhin 6,77,444-in an la kai mek a, thihpui rate hi 1.93% a ni.
ICMR Report
Indian Council of Medical Research (ICMR) chuan nimina report an tihchhuahah Covid-19 sample 7,46,608 an endik tih an tarlang a, hri len ṭantirh aṭanga nimin thleng khan sample 2,93,09,703 an endik tawh a ni.
ICMR hian sample endikna tura laboratory pawmpui 1469 a nei tawh a, heng zinga 969 hi sorkar laboratory niin 500 chu private laboratory an ni thung.
Damdawi pathum enchhin mek
Prime minister Narendra Modi chuan Inrinnia Independence Day vawi 74-na lawmnaa thu a sawinaah India ramah coronavirus damdawi chi hrang hrang pathum enchhin a nih thu a sawi a, sorkar chuan damdawi chu hman tlakah a ngaih hunah chuan mi zawng zawng ban phaka chhawp chhuah a tum tih a sawi a ni.
Union Minister of State for Health Ashwini Kumar Choubey pawhin scientist-te chuan damdawi siam chhuak tur hian theihtawp an chhuah tih sawiin a rah duhawm tak hmuh tur a awm a nih phawt chuan Covid-19 kai enkawl mekte chu damdawi dawng hmasa ber tur an ni tih a sawi ve bawk.
State pariatah case nuai khat chuang awm tawh
Maharashtra chu State/UT zinga hri kai tamna ber niin nimin khan hmuh chhuah thar 12,020 an awm leh a, hei nen hian case 5,84,754 an nei tawh a, heng zinga 4,08,286 chu an dam tawh thung a, 19,749 chuan thihpui tawh bawkin 1,56,719-in hri an la kai mek.
Maharashtra bakah hian Tamil Nadu (3,32,105), Andhra Pradesh (2,81,817), Karnataka (2,19,926), Delhi (1,51,928), Uttar Pradesh (1,50,061), West Bengal (1,13,432) leh Bihar (1,01,551)-ahte chuan hri kai hmuh chhuah nuai chuang an awm tawh a ni.
v WHO data aṭanga a lan dan chuan ni 12 chhung chu US leh Brazil aiin India rama case thar awm zat hi a tam tawh.
v Brazil aiin India ramah hian case nuai 7 velin a tlem zawk.
v India ram hi case tam ram pathumna mah ni se thihpui rate hniam ber ram zingah a tel.
v Bihar chuan Inrinni khan case nuai an nei tling chiah a, hri kai nuai chuang awmna state pariatna an ni.