J&K-ah inthlanna neih a ni ang : PM Modi

Prime minister Narendra Modi chuan kar liam ta Inrinnia Independence Day lawmnaa thu a sawiah, Jammu and Kashmir-ah inthlanna neih tum a nih thu a sawi a, J&K chuan chief minister leh minister an nei ang, a ti. 

Independence Day 74-na lawmna pui ber, Delhi-a Red Fort-a neihah PM Modi chuan hnam puanzar pawt pharhin, thu a sawi a ni. Hei hi Modi-a'n Independence Day-a thu a sawi vawi sarihna a ni. 

Modi chuan J&K chu state aṭanga UT-a siam a nih tak vangin ramri chin thar tur chu sorkar chuan a rin fel mek thu sawiin, heng ramri te siam zawh a nih hunah chuan J&K state, tuna UT ni taah ngei hian inthlanna neih tum a nih thu a sawi. J&K chuan chief minister leh minister-te an nei bawk ang, tiin Modi chuan J&K-ah hmasawnna tam tak a thlen chhoh dawn thu sawi.

Independence Day-a Modi thusawi ṭhenkhatte 

1) India mi tinten health ID card an nei vek dawn a, National Digital Health Mission pawh kalpui a ni dawn.

2) Thingtlang khua zawng zawngin ni 1,000 chhungin optical fibre network an nei vek ang. 

3) Covid-19 hri leng karah India mi vaibelchhe 130-te tana hamṭhatna tur 'Aatmanirbhar Bharat' kaltlangin sorkar chuan hmalakna a kalpui chho ṭan a, ramdanga in nghat loin mahni intodelh leh keimahni siam ngei kan hmana kan chhawr ṭangkai theih nan 'Aatmanirbhar Bharat' hi sorkar chuan a duang a ni.  

4) Ram hrang hranga com­pany-te chu India ram lam hawiin kan rama inbun an tum mek a, sorkar laipui programme 'Make in India' kaltlangin kan ramah thil tam tak kan siam a nga, ramdangte mamawh khawp siam thei turin hma kan la ang.

5) Kan ram hmeichhiate pawh tum ruhin kawng hrang hrangah hma sawnna tam tak an nei a, hna sang tak tak te thawkin coal laihchhuahnaa thawk leh vansang lama indo thlawhtheihna khalhtute zingah hial pawh an lo ṭang thei ta. Hengte hi India-in khawtlangah intluktlang taka mi tin te tana 

hamṭhatna a siam rah a ni. 

6) Line of Control (LoC) a ni emaw Line of Actual Contro (LAC) pawh nise, heng kan ramria Pakistan leh Chian ral lo lian ṭhin hi kan ram sipaite min venna a zarah kan ram chu a him ṭhin a ni. Tunhnai a Ladakh-a kan ram sipaiten kan ram an humhim zia kha khawvelin a hria a, a hmu bawk a ni.