Uttarakhand lei verh chima tangte lak chhuah an la ni lo

Uttarakhand-a Char Dham project hnuaia lei hnuai kawng verh hna thawh mek lai, Pathianni zinga chima hnathawktu mi 40 tangte chu ni 5 a ral hnu, nimin thleng khan lak chhuah an la ni lo niin thuneitute chuan an sawi. Chhanchhuah hna hi thawh mek zel a ni.

Leiverh chim karah hian chhanchhuah hna thawktute chuan metre 25-a thui an lai tlang tawh a, hnathawktu tangte awmna thleng tur hian metre 60 thlenga thui an laih a ngai a ni. An laih chinah hian pipe 900mm leh 800mm te rawlh phei tum niin, heta ṭang hian hnathawktu tangte chu lo chhuak thei tura beisei a ni. National Highways & Infrastructure Development Corporation Limited (NHIDCL) director, Anshu Manish Khalkho chuan leiverh chimah hian lei mai bakah hnathawhna atana hman thir lam leh concrete a tam avangin laih tlang mai a har thu leh, chawl loin thawk reng mah se thawh sawt a har thu a sawi a ni.

Leiverha tangte chhan chhuah hna hi National Disaster Response Force (NDRF), State Disaster Response Force (SDRF), Border Roads Organisation (BRO) leh Indo-Tibetan Border Police (ITBP) mi leh sa 125 te'n an thawk mek a ni. Anni bakah hian Thailand leh Norway aṭangin chhanchhuah hna lama mi thiam bikte'n an pui bawk. Tun dinhmunah hnathawktu tangte hi an him vek nia hriat a ni a, oxygen, damdawi, chaw leh tui te chu compressed pipe hmanga pek an ni. Official-te chuan an biakpawh reng thu sawiin, beiseina hloh lo turin an fuih reng bawk.