National Cadet Corps din belh tum
Defence minister Rajnath Singh chuan border leh coastal district-a National Cadet Corps (NCC) 173 din belh tum chu sorkarin a pawm tawh thu sawiin, hemi atan hian cadet nuai khat vel lak tum a nih thu a sawi bawk.
Kar liam ta Inrinnia India Independence Day vawi 74-na hmannaah pawh khan prime minister Narendra Modi chuan NCC din belh tum a nih thu sawiin, chhiat rupna thleng thei laka inven dan tur zirtir kawngah leh sipai lama ṭhalai zawkte training tir chu kan ramin a mamawh a ni, a ti.
NCC din belh tum chungchangah hian border leh coastal district-a school leh college 1,000 chuang thlan fel tawh a ni a, hemi atana cadet nuai khat vel lak tum zinga hmun thum a ṭhena hmun khat chu hmeichhia an ni. Heng bakah hian sorkar laipui chuan NCC unit 83-te zinga unit 53 chu Army, unit 20 chu Navy leh unit 10 chu Air Force lama training-na pek tum an ni.