Madhya Pradesh inthlanah buaina chhuak

Madhya Pradesh state assembly inthlan chu nimin khan neih a ni a, zing dar 7 aṭangin vote thlak ṭan niin, Balaghat district chhunga Baihar, Lanji leh Paraswada seat tih lohah chuan vote thlak hun hi tlai dar 6 thleng hawn a ni. Heng hmunahte hian tlai dar 3 thleng vote thlak hun chhung hawn a ni thung. Madhya Pradesh-ah hian vote nei mi vbc 5.59 dawn an awm a, heng zinga vbc 2.87 hi mipa niin, vbc 2.71 hi hmeichhia an ni

Gwalior district-a sensitive polling centre an tihahte chuan Border Security Force (BSF) company 16 duty tura dah an ni a, district thuneitute chuan polling station 276 chu ven uluk ngai zual niin an sawi. BSF bakah hian police 7,000 te'n polling station hi an vil bawk.

Vote thlakna hmun ṭhenkhatah chuan buaina a chhuak a, thi erawh an awm lo nia hriat a ni. Dimani constituency-ah pawl pahnih lunga invawm an awm a, hliam tuar pakhat a awm. Bhind district-a Mehgaon constituency-ah pawh tharum thawhna thlengin, BJP candidate, Rakesh Shukla chuan hliam tenau a tuar.

Election Commission-in an tarlan danin tlai dar 5 thlenga Madhya Pradesh pumpuia vote tla zat chu 70.99% a tling tawh. Vote tlak ṭhatna ber hi Shajapur district-ah niin, vote 70.27% a tla a, a tlak chhiatna ber chu Madhya Pradesh khawpui, Bhopal-ah niin, vote 45.34% chiah a tla a ni. Naxal helpawl thunun, Balaghat district-a Baihar seat-ah vote 61.87% tlain, Lanjhi leh Paraswada-ah te 72.32% vote a tla ve bawk. Madhya Pradesh-ah hian assembly seat 230 awmin, candidate 2,533 an awm a ni.