Chhattisgarh inthlan thawh hnihnaah vote tla tlem

Chhattisgarh state assembly 90 aṭanga seat 70 inchuhna, inthlan thawh hnihna chu nimin khan neih a ni a, Election Commission tarlan danin tlai dar 5 thleng khan vote tla hi 67.34% chiah a la tling pha.

Nimina constituency 70 inthlangte hi district 22 huam chhunga awmte an ni a, vote thlak hun chhung hi Naxal helpawl thunun, Rajim district-a Bindranawagarh seat-a polling booth pakua tih lohah chuan zing dar 8 aṭanga tlai dar 5 thleng hawn a ni. Polling booth pakuaah te hian vote thlak theih hun hi zing dar 7 aṭanga tlai dar 3 thleng hawn a ni thung.

Raigarh district-a Thenthaguddi mipuite chuan vote thlak hi boycott-in, an khuaa kawng siam a la ni lo chu an lungawi loh thu an sawi. Thenthaguddi khaw mi pakhat chuan an khuaah chuan voter 330 an awm thu leh an khuaa kawng siam a nih hma chuan tu mahin vote an thlak loh tur thu hi a sawi. Thenthaguddi ang tho hian Bilaspur district-a Manikpur Dhenka khaw mite chuan an khuaa hmasawnna ruhrel din engmah a awm lo chu an lungawi loh thu sawiin, vote thlak hi an boycott ve bawk.