Thudik lo theh darhtute lakah PCI-in action a lak a ngai : Vice President

Vice president Jagdeep Dhankhar chuan Ningania Vigyan Bhawan, New Delhi-a National Press Day hmannaah sorkar ruhrel dinna kawnga ban palina leh sorkar khalh ngiltu ber chu media an nih thu leh, media zalen leh lai tak neih theihna tur boruak siam chu a pawimawh thu a sawi. Kumin National Press Day thupui atan hian 'Media in the era of aritificial intelligence' tih thlan a ni.

Vice-President chuan chanchinthar dik lo, rintlak lo leh thu ngeiawm tak theh darh te, politics-a ṭan lam nei rana thu chhuah leh pawisa pek beisei emaw, duhsak zawng nei chunga tum ṭha lo tak nena thuthar lak khawm leh chhuah ṭhin hian mipui thinlungah media rinna a tichhia a ni, a ti. "Press Council of India (PCI) hian hre reng chung leh tihluihnaa thudik lo theh darhtute lakah hian action a la vat ṭhin tur a ni. Dan zam mai a tawk lo a, dan lekkawh chu ṭha taka thil ti duhte tan pawha an chak lehzualna hnar tur a ni"

"Journalist tam takin democracy kalphung thlak tuma hma an la hmuh hian a rilru nat thlak tak zet a ni. 'Fake news' tihte hi tun ang reng reng hian a la ri ring ngai lo, hei hian kan tunlai media dinhmun a tarlang chiang em em a ni," tiin a sawi.

Information and Broadcasting minister, Anurag Thakur pawhin National Press Day lawmnaah hian thu sawiin,"Media-te'n India ram siam ṭha tura endiktu hna a thawh tak tak hun tur hi a nghahhlelhawm hlein ka hria, chumi hunah chuan mipuite tan pawh beiseina thar an siam leh ang. Artificial Intelligence hian bung thar min kaitir mah se, a theihna hian tawp chin a nei tih hi theihnghilh lo ila. Editor-te'n kum tam tak harsa taka an thawh leh zir leh tawn aṭanga an tih theih thil hi AI hi chuan a ti thei ve ngai lo ang," a ti.