PDP hotu Mufti leh PM inbia

People's Democratic Party (PDP) hotu Mehbooba Mufti chuan nimin zing khan Prime Minister Narendra Modi chu a chenna, New Delhi-a Race Course Road-ah a kawm a, Jammu and Kashmir-a PDP leh BJP thawkdunten sorkar an siam tawh siam chhunzawm a ni leh theih dan tur an sawidun.

Hruaitu pahnihte hi minute 30 chhung vel an inkawm a, inkawm zawh hnua chanchin thar lakhawmtuten an kawmnaah, Mufti-i chuan boruak ṭha tak hnuaia thil an sawidun thu a tarlang a, mahse a kimchang erawh chuan a sawilang duh lo. Mufti-i chaun Srinagar-ah an party MLA-te a biak-rawn leh phawt tur thu leh, chumi hnuah thutlukna a siam dawn tih a sawi.

Jammu and Kashmir-ah hian PDP leh BJP hian ṭangrual sorkar an siam a, mahse kumin January thla khan Chief Minister leh PDP hruiatu Mufti Mohammad Saeed a thi a, a thih hnuah a aiawh tura ruat, a fanu Mehbooba Mufti-i hian PDP thil phut hrang hrangte central lama BJP sorkarin a tihpuitlin phutin CM atana lakluh hi a duh ta lo a ni. Hetihlai hian BJP chuan J&K-a
ṭangrual sorkar siam tura PDP thil phut chu pawm theih a nih loh thu a sawi a, hei vang hian sorkar thar siam thei loin President Rule hnuaiah an awm a ngaih phah ta a ni.

Mufti-i hian kar kalta Ningani khan Delhi hi tlawhin, BJP President Amit Shah a lo kawm tawh bawk. Mahse hemi ṭum hian inremna an siam thei lo a ni.

Jammu and Kashmir Assembly seat 87-ah hian PDP hian member 27 neiin BJP hian 25 a nei a ni.

Thawhṭanni khan Chief Minister hlui leh eptu pawl, National Conference hruaitu Omar Abdullah chuan state Governor NN Vohra chu hmuin, sorkar nei loa hun eng emaw chen an awm tawh vangin inthlan
ṭhat buatsaih mai turin a ngen.