BJP leh Congress in President inrawlh turin ngen
Uttarakhand-a politics buaina thleng mekah inrawlh tura ngenin BJP leh Congress partry aiawhte chuan a hran ve vein President Pranab Mukherjee an hmu.
Uttarakhand-a rorellai, Congress MLA zinga pakua chu Chief Minsiter Harish Rawat-a kaihhruai sorkar lakah an hel a, hei vang hian Congress party chuan Chief Minister hlui Vijay Bahuguna fapa, Saket Bahugna chu hel tura MLA dangte fuihtu berah puhin kum ruk chhung atan an party aṭangin a lo hnawtchhuak tawh a ni.
BJP chuan Congress MLA hel pakua-te nen hian sorkar thar an siam thei dawn tih sawiin, CM Rawat-a sorkar chu a rang thei anga House-a fiah an phut. Governor KK Pant chuan CM hnenah hian March 28-ah thlawptu a ngah tawk em tih fiah turin a hriattir tawh a, mahse BJP chuan sorkar fiah hun hi sawn hma an phut.
Thawhṭanni khan BJP hruaitu, Kailash Vijayvargiya kaihhruaiin party aiawhte chuan President Mukherjee hi an hmu a, Uttarakhand-a Congress sorkar chu March 28 aia hmaa fiahtir tur leh, Governor hnenah sorkar chu ṭhiah tir nghal turin an ngen.
Hemi hnu ihan Congress palaite chuan Rajya Sabha-a eptu hruaitu Ghulam Nabi Azad hoin President hi an hmu ve leh a ni. President an hmuh hnua chanchin thar lakhawmtute an kawmnaah, Azad chuan President hnenah hian central-a BJP sorkar chuan he buaina chawk chhuaktu a nih thu leh, hei hi China ramri bula awm state himna atan pawh a ṭhat loh thu a hrilh tih a sawi.
Azad chuan, 'Pathianni khan BJP hruaitute chuan Congress MLA-te hi an duhthu pawh ni loin Governor hnenah an hruai lui a, Assembly-ah anni thlawpna nen majority an neih theih thu an hrilh a ni" a ti. Sorkar fiah hun tura ruat tawh chu sawn lo turin an ngen ve thung.