Pakistan special team-in Pathankot tlawh dawn

Pakistan special team, member paruk awmna chuan March 29 hian kumin kumtira firfiakten an beih, Pathankot Airforce Base an rawn tlawh dawn.

Pakistan team hi ni li cham turin an rawn kal dawn a, an cham chhung hian airbase beituten an man, a hnua an chhuah leh tak nia insawi mi pahnihte leh officer pakhat chu National Intelligence Agency (NIA) te hriatpuiin thu an zawhfiah ve leh dawn a ni.

Pathankot airbase beihnaah hian sorkar laipui chuan Pakistan-a firfiak pawl, Jaish-e-Mohammed pawl chu mawhphurtuah a puh a ni. He pawikhawihna thleng vang hian ram pahnih inkar boruak pawh a nghawng phah a, foreign secretary level inbiakna neih tum pawh ṭhulh a nih phah bawk a ni.

Pakistan team hi an rama counterterrorism department-a additional inspector general Tahir RAi-an a rawn ho dawn a, Delhi aṭangin Amritsar-ah BSF aircraft-a hruai an ni dawn a, heta ṭang hian helicopter hmangin air base station hi panpui an ni ang. Motor-in airbase hi luhpui an ni ang a, airbase technical area aṭanga km khat chuanga hlaa, pawikhawihtu firfiak leh security force-te inkahna hmunte pawh an endik phalsak an ni bawk ang.