Kanhaiya'n Hyderabad University a tlawh Campus-ah thusawi phalsak lo

Jawaharlal Nehru University (JNU) Students' Union president, tunhnaia ram dodal zawnga thusawia puh a nih vanga man, Kanhaiya Kumar chuan nimin khan kumin January thlaa Dalit zirlai Rohit Vemula intihhlumna, Hyderabad University tlawh turin a kal a, mahse campus chhungah thu a sawi phalsak a ni lo.

Kanhaiya Kumar hi JNU campus-a zirlai ṭhenkhatin firfiak Afzal Guru hriatrengna inkhawm an buatsaihah ram dodal leh hel zawnga thu sawiah puhin man a ni a, bail-a chhuahtir mek a ni.

Hyderabad University zirlai, Rohith Vemula hi kumin January thla khan university thuneituten hostel aṭanga an hnawhchhuah hnuah, hostel-a a ṭhianpa room-ah inawkhluma hmuh a ni. University zirlaite chuan Rohith hrem a nih chungchangah central-a BJP minister pahnih leh university vice-chancellor-te chu inhnamhnawihah puhin, hun rei tak chhung lungawi lohna an lo lantir tawh a ni. Kanhaiya hian zirlaiten VC ban phuta nawrh an huaihawt-naah telpui a tum a,Rohith-a nu pawh hmuh a tum bawk.

Rohith Vemula tana rorelna dik phuta nawrh huaihawttu, Joint Action Committee for Social Justice chuan Kanhaiya hi an university-a inkhawm an buatsaihah thu sawi turin an sawm a ni. Kanhaiaya hi nimin tlaiah campus chhungah thu sawi tura tih ni mah se, university thuneitute chuan hemi chungchangah hian dilna engmah pek an ni lo tih sawiin a thusawi hi phalsak a ni lo tih an sawi.

Hyderabad University chuan zirlaite nawrh huaihawt vang hian ni li chhung class a suspend tawh a, campus chhungah pawn lam mi luh a khap bawk. Zirlai lungawi lote hian Thawhlehni khan vice-chancellor chu a chenna inah luhkhungin, a tukverh leh kawngkhar bakah TV-te an lo tihchhiatsak tawh a ni.

Zirlaiten VC chenna in an suasam avanga lungawi loin, university-a non-teaching staff 750 te chuan hna an thawk duh lo a, hei vang hian Thawhlehni zan khan hostel-a awm zirlai sang tel chuan ei tur pawh an nei lo a ni.

Thawhlehni-a zirlaite tharum thawhna avang hian police-te chuan mi 27 lakah thubuai an ziaklut a, an zingah hian zirtirtu pahnih an tel.

Tharum thawhna thlen hnua pawn lam mi tana campus khar a nih vang hian Kanhaiya Kumar chuan campus chhungah thu a sawi phalsak lo mah se, campus pawn lamah inkhawm an buatsaih mai dawn tih a sawi.

JNUSU President hian Hyderabad a pan hmain, Thawhlehni khan New Delhi-ah Congress vice president Rahul Gandhi chu a chenna inah a kawm. Kanhaiya Kumar hi JNUSU team leh All-India Students Federation member-ten an ṭawiawm a ni. Mahse Gandhi leh Kanhaiya te meeting chungchang hi kimchanga puanzar a ni lo a, NSUI hotu Roji M John chuan JNU buaina chungchangah Rahul Gandhi an zirlaite a thlawpna a lantir avangin lawmthu an hrilh niin a sawi. Gandhi hian JNU zirlaite bakah FTII leh IIT Madras-a zirlaiten an zirna-a sorkar laipui inrawlh dan duhlohna an lantir mek pawh a thlawp thu sawiin, zirlai nawrh huaihawtte chu a lo tlawh tawh bawk a ni.