India ramah Zika virus vaccine siam mek : WHO

World Health Organization (WHO) chuan tun-laia hri leng mek,Zika virus vaccine siam hna chu ram panga-ah kalpui mek a nih thu sawiin, heng zingah hian India ram a tel tih a sawi.

WHO Director-General Margaret Chan chuan kum khat pawh tling loah Zika virus chu hrileng satliah atangin khawvel ram pumah mipui hriselna tiderthawng thei thilah a chang thei tih sawiin, he hri chung-chang hi an hriat hnem pauh leh thil awmdan chu a ṭha lo niin a tarlang.

WHO hian company 30 chuang ten hri leng mek test-na tur siam hna hi an thawk mek a, a vaccine siam tumin project 23 kalpui mek a ni tih a sawi. Heng zinga 14 chu US, France, Brazil, India leh Australia-a vaccine siam ṭhinten an tawk a ni.

Kumin February thla khan WHO chuan Zika virus vang hian international public health emergency a lo puang tawh a, ram 38-ah he hri vei hi hmuhchhuah an ni tawh bawk.