J&K-ah PDP-BJP sorkar a ding dawn ta

Jammu and Kashmir chu President's rule hnuaia thla hnih zet a awm hnuah, Bharatiya Janata Party (BJP) chuan People's Democratic Party (PDP) nena ṭangrual sorkar siam a remti thei ta.

Press conference a neihah, BJP hruaitu Sat Sharma chuan party pahnih hruaitute hian Governor NN Vohra hmuin, sorkar an siam theih thu hi an hrilh thuai dawn tih a sawi bawk.

Nimin khan J&K-a BJP MLA te chuan minister of state in the Prime Minister's Office Jitendra Singh leh BJP general secretary Ram Madhav-te nen meeting neiin, ṭangrual sorkar siam chhunzawm leh hi an remti ta a ni.

Thawhlehni khan PDP president Mehbooba Mufti chu New Delhi-ah kalin, Prime Minister Narendra Modi a lo hmu tawh bawk a ni. PM a hmu hnua chanchinthar lakhawmtute a kawmnaah, Mufti-i chuan an harsatna neihte chinfel dan an ngaihtuah dawn tih a sawi.

BJP chuan ṭangrual sorkar thar din tur hian BJP leh PDP chuan a hmaa thawhdunna tura thuthlung an lo siam tawh chu hman a ni dawn a, PDP chu thil phut nei thar lo turin a ti bawk niin a tarlang.

PDP president Mehbooba Mufti chu sorkar tharah hian Chief Minister a ni dawn a, Jammu and Kashmir-a hmeichhe chief minister ni thei hmasa ber a ni ang. BJP chuan PDP chief minister candidate chu an thlawp tur thu sawii, party chan tur deputy chief minister post atan Nirmal Singh chu an thlang nghal bawk.