Pune college-a buaina chhuakah thubuai ziak lut

Pune-a Fergusson College campus-a Nationalist Congress Party (NCP) worker leh BJP zirlai pawl, Bharatiya Janata Yuva Morcha (BJYM) leh AVBP inkara buaina chhuak vangin police-ten mi 200 lakah thubuai an ziak lut.

College campus-ah hian Thawhlehni khan ABVP chuan thuneitute hriatpui lohin meeting, 'Truth of JNU' tih thupui hmangin an huaihawt a, hei hi Dalit zirlaite chuan an tibuai a ni. A tuk Nilaini atang khan campus chhungah hian buaina hi a punlun chho ta a ni.

College principal RG Pradeshi chuan police-te ko lutin, ram dodalna thu sawia puhin Dalit zirlaite lakah complain a thehlut a, mahse a hnuah a complain hi a hnukdawk leh nghal a ni.

Nilaini khan NCP MLA Jitendra Awhad chuan Dalit zirlaiten principal-in a puhna avanga an lungawi lohna an lantirna hmun chu a tlawh a, MLA hi BJP zirlai pawl chuan an lo khawih zui a, a car chu lungin an tawng bawk a ni.

Left party thlawptu, Ambedkarite group chuan BJP zirlai pawl inkhawm buatsaihah JNU Students' Union leader Kanhaiya Kumar leh Hyderabad University-a Dalit zirlai, mahni intihlum Rohith Vemula-te chu an thlawpna thu an aupui a, hei bakah hian RSS leh Prime Minister Narendra Modi-te inluling mek lak aṭanga zalenna an duh thute an aupui bawk.