Mumbai Court-ah David Coleman Headley inlan leh

Kum 2008 November 26-a Pakistan firfiakten Mumbai khawpui an beihnaa mawhphurtua puh, Lashkar-e-Toiba firfiak David Coleman Headley chu Ningani khan Mumbai Court chuan video link kal-tlangin thu a zawtfiah leh.

David Headley-a hi Mumbai beihnaa a inhnamhnawih avangin US-ah man a ni a, kum 35 tang tura hrem a ni. Kum 2008-a Mumbai khawpui beihnaah hian mi 166 an thi a ni.

Ningani-a Court hmaa a inlan hian Headley hi zawhna te ṭha takin a chhang a, a naupan lai
aṭang tawha India leh India mite a huat thu leh, India rama chhiatna a theih anga thlentir chu a tum a nih thu a hrilh.

Headley-a chuan, "Kum 1971, december 7 khan ka school kalna chu bomb a ni a, kan school-a thawkte pawh mi eng emaw zat an thi a ni' a ti. Hei hi Pakistan leh India indo lai a ni a, hetihlai hian Headley hi kum 11 mi a ni.

David Headley chuan Pakistan firfiak pawl, LeT a zawm dawn khan a nupui pawhin a hnial lo tih a sawi a, a nupui houi Faiza-i pa chu LeT mi anih bakah Pakistan ISI tana thawk tawh a nih thu a sawi bawk. Hetihlai hian a unaupa, PM office-a public relation officer Danyal Gilani chuan firfiak pawl nena inzawmna an neih hi a hre lo niin a sawi thung.

Kum 2008-a Mumbai khawpui beih a nih hnu lawk khan khatih laia Pakistan Prime Ministr Yusuf Raza Gilani chuan a chenna inah a rawn tlawh niin Headly chuan a sawi.