India-in Hydroxychloroquine a hmang chhunzawm dawn
World Health Organisation (WHO) in Covid-19 kaite enkawlna atana malaria damdawi, Hydroxychloroquine hman chu titawp lailawk turin ram hrang hrangte ngen mah se, India chuan hri leng dona kawnga a hmatawngtu, healthcare worker-te tan he damdawi hi invenna turin a hmang chhunzawm zel dawn.
Indian Council of Medical Research (ICMR) director general Dr Balgam Bhargava chuan Mach thlaa in-vitro studies neihnaah he damdawi hian antiviral property a nei tih hriat anih avangin hri kaite enkawlna atana hman tura rawt a lo ni tawh a ni, a ti. Zirchianna hrang hrangah HCQ hman hian side-effect a nei nasa lo tih pawh tarlan a nih thu a sawi bawk.
Covid-19 chunchanga sorkar laipui hmalakna hrang hrangte sawinaah hemi chungchang hi Dr Bhargava chuan a sawi chhuak a, "He damdawi hi Covid-19 laka invenna atana hman turin a ṭangkai niin kan ngai a, mahse damdawi lam thiamten uluk taka an enpuina hnuaiah hman turin kan duh a ni," a ti.
Hetih lai hian WHO director general Tedros Adhanom Ghebreysus chuan Covid-19 kaite enkawlna tana Hydroxychloroquine hman hi a him tawk em tih zirchian mek a nih thu leh, hei vang phalna bik pek tih lohah chuan hri kaite enkawlna atan hman rih loh nise tiin executive group-in a rel tih a lo puang tawh a ni.