Zirna in hawn khap chhunzawm a la ni

Union Home Ministry chuan ram chhunga zirna in zawng zawng leh a khaihhnawihte chu Covid-19 hri leng vanga la khar vek tur a ni thu a tarlang.

Media report ṭhenkhatin ministry-in state-te hnena zirna in hawn phalna a pe nia an tarlan avangin home ministry chuan chhang nghalin, MHA chuan zirna in hawng turin thutlukna a la siam lo a, phalna pawh pek a la ni lo tih a sawi. Ram pumah zirna in hrang hrangte chu hawn khapsak vek an la ni tiin ministry thupuangtu chuan a sawi. 

Covid-19  leng vangin March thla tawp lam aṭang khan ram puma zirna inte chu khar a ni a, he hmalakna hi zirlaiten hri an kai loh nana tih a nih bakah hri darh zel tur venna atan tih a ni. 

March ni 25 aṭanga khan sorkar laipui chuan ram puma inkharkhip (total lockdown) a kalpui a, May 3 leh May 17 thlenga pawhsei leh a ni a, a thawh lina atan May 31 thleng pawhsei leh a ni.