NMC-in NEET 2024 syllabus paih ṭhen

National Medical Commission (NMC) chuan NEET 2024 syllabus tur ennawnna leh siam ṭhatna neiin, NEET 2024 atan syllabus paih ṭhen a ni a, sub-topic belh niin, hetih lai hian Chemistry aṭangin chapter pakua leh biology aṭangin chapter paruk a paih thung.

NMC hian Chemistry portion aṭang hian; State of Matter, Hydrogen, The s-Block Elements, Environmental Chemistry, The Solid State, Surface Chemistry, General Principles & Processes of Isolation of Elements, Polymers leh Chemistry in Everyday life chapter-te a paih. Biology aṭangin; Transport in Plants, Mineral Nutrition, Digestion and Absorption, Reproduction in Organisms, Strategies for Enhancement in Food Production leh Environmental Issues chapter te chu a paih bawk a ni. Hetih lai hian Physics leh Biology-ah sub-topic panga a belh thung.

Parishrama NEET Academy Dean leh Chief Executive Officer (CEO) ni bawk, Hanumantha Rao chuan Chemistry aṭang chapter 30 awm ṭhin chu chapter 21-ah tihtlem a nih thu leh, chapter an paih takte chu a awl avanga zirlaite'n mark hmuh ṭhat nana an hman thu a sawi a, hetih lai hian Biology aṭanga chapter an paihte erawh chu zirlaite'n an medical zir zawmna atana an hman ṭangkai thu a sawi.

NEET exam hi National Testing Agency (NTA) buatsaih leh huaihawt ṭhin a ni a, syllabus pawh NTA siam leh buatsaih a ni. Kuminah erawh NEET 2024 syllabus chungchangah hian NMC-in thu tawp a siam a ni. NEET hi medical exam atana luhka niin, mark 720 pua exam neih ṭhin a ni a, biology-in mark 360 puin, physics-in mark 180 leh chemistry-in mark 180-te a pu bawk a ni.