Maldives-in a sipaite ko kir turin India ngen

Maldives President atana lak luh a nih hnu lawkah, Mohamed Muizzu chuan an rama India sipai awmte chu ko kir turin India a ngen. Muizzu hian India a ngenna hi President atana amah lak luh a nihna inkhawma India aiawha kal, Kiren Rijiju nen an inkawmnaah a sawi.

Maldives President office chuan Kiren Rijiju leh President Muizzu inkawm thu hi tarlangin,"Meeting-ah hian Muizzu hian India-in a sipai, Maldives-a a dahte ko kir turin a ngen a ni. September thlaa President thlanna neih a nihin Maldives mipuite chuan India hnena he ngenna siam tur hian an phut thu Muizzu hian a sawi a, beiseina sang tak nen Maldives ngenna chu India pawhin a zawm an beisei thu a sawi a ni," a ti. Maldives hian September thla khan President thlanna neiin, Muizzu kaihhruai Progressive Party of Maldives chuan President ni lai, Ibrahim Mohamed Solih kaihhruai Maldivian Democratic Party (MDP) hnehin sorkarna an siam a, Muizzu hian sorkarna an siam hnuah, Maldives-a an ram chhunga ram dang sipai an awmtir loh tur thu hi a lo tlangaupui tawh a ni.