Tablighi Jamaat inkhawmpuia kal ram dang mite lakah chargesheet thehlut
Delhi Police Crime Branch chuan March thlaa Tablighi Jamaat inkhawmpuia kal ram dang mi 280 laka chargesheet an siam chu Delhi Saket court-ah an thehlut.
Heng ram dang mite hi Delhi-a Nizamuddin Markaz-a Islamic missionary movement, Tablighi Jamaat inkhawmpui chhim tura lo kal an ni a, Saudi Arabia, Malaysia, Indo-nesia, Brazil leh ram dang aṭanga lo kalte an ni.
Crime Branch chuan tun thla tir khan Tablighi Jamaat-te funding pek dan chungchanga document kimchang chu an la khawm a, Jamaat hotu Maulana Saad-a lamhnai passport panga chu Crime Branch hian a hrensak tawh bawk a ni. Ram dang aṭanga inkhawmpui chhim, Jamaat member zawng zawngte hi Delhi police-te chuan an hrechhuak tawh a, an hotu Maulana Saad-a thupek angin March 20 hnuah pawh Markaz-ah hian tangkhang an la awm tih hriat a ni bawk.
Heng an thil chhui aṭang hian Delhi police-te chuan an bank account-te pawh ensakin, Gulf ram aṭanga fund an hmuh ṭhin thute pawh hriat a ni. Inkhawmpuia kal zawng zawngte an hriat theih nan May 5 khan Delhi police te chuan Maulana Saad-a fapa chu thu an lo zawt fiah tawh bawk a ni.
May 15 khan Muslim organisation, Jamiat Ulema-e-Hind chuan Nizamuddin Markaz-a inkhawmpuia ram dang aṭang lo kal Tablighi Jamaat member chu 1,640 an ni tih thu leh, heng mite hi ram 47 aṭanga lo kal an nih thu a sawi. He khawmpuia chhimtu zinga mi 64-te chuan Covid-19 an kai bakah, he hri vang hian Tablighi Jamaat member pahnih an thi tih a tarlang bawk.
Sorkarin a tarlan dan chuan inkhawmpuia kal zingah hian Covid-19 kai an awm a, hei vang hian India rama hri kai pun chak lam chu 30% in a san phah tih a tarlang. He inkhawmpuia kal ṭhenkhatte hi ram chhung hmun hrang hranga an kal avangin hri hi an pu darh niin sorkar chuan a tarlang bawk.