Uttarakhand-ah President's Rule puang

Uttarakhand-a politics buaina thleng mek avangin nimin zing khan President Pranab Mukherjee chuan Article 356 hnuaiah President's Rule hnuaiah a dah.

Uttarakhand-ah hian rorellai, Congress MLA zinga pakua chu Chief Minister Harish Rawat-a kaihhruai sorkar lakah an hel a, hetihlai hian eptu party BJP chuan Congress MLA helte nen hian sorkar thar an siam thei niin an inchhal. Governor KK Paul chuan CM hi March 28-ah sorkar siam chhunzawm zel tura thlawptu a ngah tawk leh tawk loh House-ah fiah turin a ti a, mahse fiah a nih hmain President Rule hnuaiah dah a ni ta a ni.

Kar kalta Inrinni zan khan Union Cabinet chuan Prime Minister Narendra Modi-a kaihhruaiin emergency meeting a nei a, meeting-ah hian Uttarakhand Governor-in an state chhung politics dinhmun thleng mek chungchangah report a thehluhte an ngaihtuah ho a ni. Meeting zawhah Finance Minister Arun Jaitley chuan President hi hmu nghalin, an thurelte a hrilh a ni.

Congress MLA helte chuan an state-a President Rule puan a nih chhanah party vice president Rahul Gandhi chu an puh. MLA Subodh Uniyal chuan an party buaina chungchang chu Rahul Gandhi an a hrechiang tawk nia sawiin, "BJP nena inbe turin kan inhawng tih kan sawi ringawt a, thutlukna kan la siam lo a ni" a ti.MLA dang Harish Rawat pawhin Congress high command chu an buaina thlen tuah a puh bawk.

Hetihlai hian Congress party chuan Uttarakhand-a President Rule puan a ni chu sawiselin, democracy rahbeh tumna a ni, a ti. State Chief Minister Harish Rawat pawhin central-a BJP kaihhruai NDA sorkar chuan President Rule hmangin an state chu awpbeh a tum a ni tiin, sorkar laipui thil tih dan chu parliamentary system-ah pawm theih a ni lo, a ti. Hei bakah hian BJP chuan sum leh tharum hmanga democracy rahbeh tuma beihah a puh bawk a ni.

Uttarakhand Speaker Govind Singh Kunjwal chuan Inrinni khan CM Harish Rawat-a rawtna angin Congress MLA hel pakuate hi a disqualify a, hei vang hian CM hian House-ah pawh fiahna a paltlang ngei rin a ni. Mahse Congress sorkar hi fiah a ni hmain central-a BJP sorkar chuan che thei loin a siam zui ta a ni.