Pakistan JIT-in India thleng

Firfiakten Pathankot air force an beih dan chhui tura Pakistan sorkarin a din, Pakistan Joint Investigation Team (JIT) chuan nimin khan India an rawn thleng ta.

Member panga awmna Pakistan team hi Punjab-a Counter Terrorism Department (CTD) hotu leh Additional Inspector General of Police Muhamamd Tahir Rai-an a ho a ni.

Vawiinah Pakistan team hi National Intelligence Agency (NIA) headquarters-ah NIA hotute an kawm dawn a, minute 90 chhung hun hmangin he pawikhawihna thleng an chhui tawh dante an hrilh nghal bawk ang. Tun ṭum hi Pakis-tan firfiakten India rama pawikhawihna an thlen chungchang chhui tura Pakistan intelligence leh police official-ten India an rawn kalna hmasa ber a ni.

Pakistan team-in thu an zawhfiah tur zingah hian Punjab Police SP Salwinder Singh, a ṭhianpa Rajesh Vermna leh a eisiamtu Madan Gopal bakah, pawikhawihna thlen ṭuma hliam tuar mi 17-te an tel. Salwinder Singh leh midang pahnihte hian firfiakten January 1-a IAF base an luhkhung hma zan kha an rubo niin an sawi a, mahse a hnuah an chhuah leh nghal niin an sawi.