Uttarakhand-a rorellai, Cong-ress party MLA pakua-te Chief Minister Harish Rawat-a kaihhruai sorkar laka an hel avanga politics buaina a thlen chhunzawm zel avangin, Pathianni khan sorkar laipui chuan President's Rule hnuaiah a dah. 
Chief Minister Harish Rawat chuan an state-a President's Rule puan dodalna hi nimin khan Nainital-a High Court-ah thlen a tum. CM bakah hian MLA hel pakua-te pawhin Uttarakhand assembly speaker-in assembly member an nihna a hlihsak chu court-ah hian khin let an tum bawk. 
State Governor KK Paul chuan rorellai MLA pakua-te sorkar laka an hel hnuah, CM Rawat chu a kaihhruai sorkarin thlawptu a ngah tawk leh tawk loh fiah turin a hriattir a, sorkar fiahna hun atan hian nimin kha an ruat a ni. Mahse sorkar fiah hun a thlen hma ni, Pathianni khan sorkar laipui chuan President's Rule hi a puan hnan ta a ni. 
Rawat-a chuan sorkar laipui thiltih dan chu democracy ngaihnepna a ni tiin, Congress party chuan court-ah khin let a tum thu leh, central-a Narendra Modi-a kaihhruai BJP sorkar chuan state hrang hranga BJP ni lo party dang sorkarna state-te tihchhiat tuma a beih dante pawh finfiahna nen pholan ngei a tum tih a sawi.
Congress vice president Rahul Gandhi pawhin a twitter kaltlangin Uttarakhand state chunga sorkar laipui chet dan a dem thu a sawi. Rahul Gandhi chuan PM Modi chu a thuneihna hmanga mipuite duhthlanna hnawlsak lo turin a ti a, mipuite duhthlanna ngaichang tur leh, an dikna chanvo neihte rahbeh sak lo turin a ti. 
Uttarakhand-a President's Rule puan a nih tak avang hian Governor KK Paul adviser atan mi pahnih ruat nghal an ni. Governor adviser atana ruatte hi CRPF Director General hlui Prakash Mishra leh Unon Culture Secretary hlui Ravindra Singh-te an ni.