Haryana Cabinet-in Jat Reservation Bill pawm

Haryana state cabinet chuan an state chhunga Jats hnam tana quota pekna tur bill chu nimin khan a pawmsak ta.

Cabinet-in a pawm tak avangin Jat Reservation Bill hi state Assembly-ah pharh a ni dawn ta a ni.

Haryana Chief Minister Mannohar Khattar chuan BJP kaihhruai sorkar chuan March 31-a tawp tur, Budget session neih mekah Jats leh hnam tenau dang pali - Jat Sikhs, Bishnois, Tyagis leh Rors tana reservation siamna tur bill chu pharh a nih tur thu a sawi. CM chuan reservation bill thar siam hian an state-a Other Backward Classes (OBCs) tana 27% reservation lo siam tawhte chu a tihdanglam phah dawn lo tih a sawi. Hetihlai hian OBC chuan an category-a Jats hnam dah tel hi an dodal thung.

Jats hnam hian an hnam puala quota siamsak phutin hun eng emaw chen nawrh an lo huaihawt tawh a, nawrh huaihawtna tharum thawhna thleng vanga nunna chante pawh an awm a ni. Mahse sorkar nena an inbiak hnuah, Jats hnam aiawhte chuan reservation bill pass turin sorkar chu hun an pe a, April 3 hma chu sorkar thu ngaichangin nawrh huaihawt an tawpsan rih tur thu an lo sawi tawh a ni.