Covid-19 laia thawktute hnenah Indira Gandhi peace prize hlan

Indira Gandhi prize for peace, disarmament and development 2022 chu Pathianni khan sem niin,covid-19 hri len laia thawktute zawng zawng aiawhin Indian Medical Association leh Trained Nurses Association of India hnenah hlan a ni.

Lawmman hi India vice-president hlui, Hamid Ansari chuan Indian Medical Association president, Dr. Sharad Kumar Agarwal leh Trained Nurses Association of India president, Prof. Dr. Roy K. George-te hnenah a hlan.

Indira Gandhi memorial trust hi Congress parliamentary party chairperson, Sonia Gandhi enkawl lai niin, kumina chawimawina an pek chu ramin harsatna a tawh laia mahni himna dah ṭhaa thawktu zawng zawng; doctor, nurse, karamchari leh damdawi thiamna lama thawkte zawng zawng tana hlan a nih thu a sawi. Sonia Gandhi chuan,"He lawmman pek hi amah Indira Gandhi-i'n a dam chhunga a thawh hahpui em em hlawhtlinna lantirna a ni," a ti.

"Politics huanga intluk tlanna duha kalphung pela a chetna emaw, mi retheite tana a hmalakna emaw, ram dangte huat khawpa khawvel huapa ei tur tlakchhamna tireh tura a beihna te, mipuite beisei anga ram ṭha zawk nei tura mi dang zawng aia a thawhna nasa tak thlengin, amah kha mipuite tana thawktu ropui tak a ni tih a lantir chiang hle a ni," tiin a sawi.

Sonia Gandhi hian Covid-19 hri leng chu ram, khawtlang, chhungkua leh hnam engmah zuah loa chhiatna thlentu rapthlak tak a ni tiin,"Covid-19 hri len lai khan kan doctor, nurse leh medical lama thawktute'n rim taka an thawhna leh harsatna an hmachhawn dan kan hmu vek awm e. Anni hian anmahni leh chhungkua pawh ngaihtuah chang loin ram leh khawtlang tan an bei tak meuh meuh a ni. Mipuite tan natna hrik hmaah khan an ding tlat a ni," a ti. Indira Gandhi peace prize chawimawina hlanna hunah hian Congress president, Mallikarjun Kharge bakah Congress general secretary, KC Venugopal leh Shivraj Patil te an tel.