Thlai ro hal vangin loneitute lakah FIR 932 theh lut tawh

Punjab special director of police, Arpit Shukla chuan thlai ro hal a nih avangin November 8 aṭang khan loneitute lakah FIR 932 theh luh a nih tawh thu sawiin, case 7,405 aṭanga pawisa chawitir tling khawm hi Rs. vbc 1.67 a tling bawk niin a sawi.

Shukla chuan thlai ro hal venna kawnga an hmalakna avangin ni hnih chhung chu loa thlai ro halte a tlakhniam tawh thu a sawi. Punjab leh Haryana-a thlai ro hal hi Delhi-a boruak chhia tizualtu ber niin an sawi a, a bikin October leh November thlaa boruak chhe zual ṭhin chu thlai ro hal khu vang a nih thu an sawi a ni.

Hemi chungchangah hian November 7 khan Supreme Court chuan Punjab,Haryana, Uttar Pradesh leh Haryana-a thlai ro hal ṭhin chu titawp turin hriattirna a tichhuak tawh. Hemi hnu hian Punjab police-te chuan senior officer, range officer, police commissioner, senior superintendent leh station house officer hrang hrangte nen an state-a thlai ro hal titawp tura hmalak dan tur sawiin meeting an nei fo a ni. DGP Gaurav Yadav chuan Arpit Shukla hi nodal officer atan ruatin, ani kaihhruaina hnuaiah hian police flying squad 1,072 leh civil official eng emaw zatin thlai ro hal tur ven hna hi an thawk a, hemi kaihhnawihah hian meeting 2,189 neih a ni tawh bawk.