SC-in Kerala Governor hnenah insawifiah tura hriattirna pe

Supreme Court chuan nimin khan Kerala Governor, Arif Mohammad Khan-a'n bill a kawl tan avanga Kerala sorkarin court-a an thlen chungchang ngaihtuahin, Governor hi insawifiah turin hriattirna a pe. Supreme Court hian nimin khan Kerala bakah Tamil Nadu sorkarin an Governor laka petition an theh luhte a ngaihtuah a ni.

Judge pathum; Chief Justice of India, DY Chandrachud, senior advocate, KK Venugopal leh advocate, SK Sasi te ṭhut bench chuan Governor-te'n state assembly bill an kawl tan ṭhin chu hri chhia anga a hluar thu an sawi. Venigopal chuan Kerala Governor hian Kerala sorkar bill a kawl tante hi thla sarih aṭanga thla 24 zet nia sawiin, Governor pawh article 168 hnuaia state thuhnuaia awm a nih thu leh, a chet dan chu democracy-a mipuite chanvo kalh a ni, a ti. SC hian Governor bakah hian additional chief secretary hnenah pawh notice pe bawkin, November 24-ah ngaihtuah chhunzawm a nih tur thu a sawi.

Kerala sorkarin SC-a petition an theh luhah hian Governor chet dan hi mipuite chanvo rahbehsakna a nih thu an tarlang a, India constitution-a article 200 chuan Governor inkaihhruaina a tarlanah pawmpuina pek tura Governor hnena bill lut reng reng chu Governor hian a pawmpui emaw, ngaihtuah ṭhat ṭul a ti emaw, President hnenah a thlen duh pawh ni se, a rang thei ang bera a chet a ṭul tih tarlan a nih thute an sawi bawk. Kerala sorkar hian bill pariat chu Governor hian a kawl tang mek niin a tarlang.