INDIA zirlai pawlte'n NEP dodalna lantir dawn

Eptu party ṭang rual pawl, INDIA zawmtu party hrang hrang zirlai pawl 16 te chu nimin khan New Delhi-ah inhmu khawmin, New Education Policy (NEP) hnukdawk tura sorkar laipui nawr turin, NEP dodalna lantir an tum thu an puang.

Zirlai pawlte hian NEP dodalna lantirna hi nakkum January-ah Parliament pana kawngzawhin bul ṭan an tum niin an sawi. DMK zirlai pawl hruaitu leh Tamil Nadu MLA ni bawk, CVMP Ezhilarasan chuan,"Kan slogan chu Save education, Reject NEP; Save India, Reject BJP" a ni tiin, party hrang hrang zirlai pawl intel khawm chuan NEP dodal turin zirlaite a hruai khawm dawn a ni, a ti.

Ezhilarasan chuan zirlaite puihnain India chhim lam state-te'n February 1-ah Chennai-ah kawngzawh an neih tur thu sawi bawkin, Tamil Nadu Assembly pawhin NEP chu state-in zirna atana hma a lak tawhnate tiṭhuanawptu a nih avanga an hnawl thu a sawi. Left party awn, Students Federation of India general secretary, Mayukh Biswas chuan NEP dodal tura kawngzawh an ṭan ni tur chu Swami Vivekananda pian cham nen inrem tura duang an nih thu leh, chu chuan zirna hmasawnna atan mahni intodelh pawimawhna a lantir thu a tarlang. "NEP hian zirna a tichhia a, sorkar sikulte khar niin, central leh state university-te chuan centre duh dana anga kal chu harsa an ti a ni. NEP tum ber chu sumdawnna leh sakhaw behchhan neia zirna kalpui a ni," tiin a sawi.

Zirlai pawl intel khawmah hian Samajwadi Party (SP) hnuaia zirlai pawl, Rashtriya Janata Dal (RJD) leh Rashtriya Lok Dal (RLD) bakah, Left wing pawl hrang hrang; All India Students' Federation (AISF) leh All India Students' Association (AISA) te an tel. Nimina meeting-ah hian an thil phut pasarih sawihoin, heng zingah hian NEP dodalna te, zirna chawikanna atana sum tam zawk hman leh tun sorkar hnuaia zirlaibu leh syllabus-a sakhaw vulh bik awm thei tihtawp chungchang te a tel a ni.