Criminal law pathum thlakna tur bill-a Hindi hming hman pawm

BJP MP, Brijlal kaihhruai parliamentary standing committee on home affairs chuan criminal law pathum thlakna tur bill-a an hming thlakna atana Hindi hming hman rawtna chu a pawm.

Indian Penal Code, 1860; Criminal Procedure Act, 1898, leh Indian Evidence Act, 1872 te thlakna atan hian The Bharatiya Nyaya Sanhita (BNS-2023), Bharatiya Nagarik Suraksha Sanhita (BNSS-2023) leh, Bharatiya Sakshya Adhiniyam (BSA-2023) te hman rawt a ni. Parliamentary committee chuan India Constitution-a article 348-in Supreme court, High court, bill leh act bakah dan kaihhnawih thil lehkhaah te chuan English hman tur tih a inziah thu leh, criminal law thlakna tura rawt hmingte chu English thumal hmanga ziah vek a nih avangin constitution a kalh lo tiin a pawm a ni.

Congress party hruaitu hlun, P. Chidambaram chuan sorkar laipuiin bill hming atana Hindi hming a rawtna chu a hriatthiam loh thu sawiin,"Hindi hi hman loh tur ka ti lo a, English-a ziah a nih si chuan English hming pek mai tur a ni. Hindi hman a nih erawh chuan Hindi hming pek pawh a theih. Bill an draft hian English-in an ziak a, Hindi hming an pe leh si a, an rilru hi hriatthiam a har a ni," tiin a sawi. Ani bakah hian Tamil Nadu-a rorel lai, DMK pawhin criminal law bill pathum hming atana Hindi hming hman hi an dodal thu an puang tawh a, Madras Bar Association chuan sorkar laipuiin bill hming atana Hindi hming hman chu dan kalh a ni, an ti bawk.