April 4-ah J&K CM thar atan Mufti lakluh beisei

Jammu and Kashmir-a People's Democratic Party (PDP) leh Bharatiya Janata Pary (BJP) te chuan sorkar siam chhunzawm tura an inrem theih tak avangin April 4 hian PDP hruaitu Mehbooba Mufti-i chu Chief Minister atana lakluh beisei a ni.

PDP chuan Delhi lama thang mek an party senior member-te hman hun turte an tihchian hunah, CM thar lakluh hun atan April 4 hi an ruat fel an rin thu a sawi.

Kar kalta Inrinni khan Mufti-i hian Governor NN Vohra chu hmuin, BJP MLA-te thlawpna nen sorkarna a siam theih thu a hrilh a ni. Member 87 awmna J&K Assembly-ah hian PDP hian MLA 27 neiin, BJP hian 25 a nei a ni.

CM thar tur, kum 56 mi Mehbooba Mufti-i chuan a kaihhruai sorkarin a ngaih pawimawh ber tur chu an state-a remna leh muanna, inpumkhatna ṭha a awm theihna tura thawh leh, state hmasawnna thlen te a nih thu a sawi. BJP leh PDP inkarah portfolio inchuh a awm nia sawi chu a dik loh thu a sawi bawk.

PDP-in legislature party hruaitu atana Mufti an thlan hnuah, BJP MLA 25-te pawhin an hruaitu atan Nirmal Singh an thlang a, Singh hi sorkar tharah hian Deputy Chief Minister a ni ang. Mufti-i pa, Chief Minister hlui Mufti Mohammad Sayeed-a kaihhruai sorkarah pawh khan Deputy CM hi a lo ni tawh a ni,