India-in Canada tan e-visa service hawng leh tawh

Canada nena an inkar boruak ṭha lo avanga sorkar laipuiin Canada khua leh tuite tana thla hnih zet e-visa service a tihtawp hnuah, nimin aṭang khan a hawng leh ta.

Visa zawng zawng, khualzin visa pawh tiamin hawn leh vek a ni a, thla hmasa khan visa chi thum, sumdawnna leh medical visa te chu hawn a lo ni tawh bawk.

India leh Canada hi June thlaa Canada leilunga Khalistan firfiak hotu, Hardeep Singh Nijjar thah a nih chungchangah inhmu thiam loin, Canada hian India hi a ram leilunga Canada khua leh tui thahna kawnga inrawlhah a puh a, hei hi India hian a pha thung. Boruak ṭha lo an neih hnuah September 21 khan India hian Canada khua leh tuite tan visa dil phalna chu tiam chin awm lo tiin a lo titawp tawh a ni.

Ram pahnihte hian an rama ram lehlam palai awmte an inthawn hawsak bawk. India-in Canada zin turte tana fimkhur tura thuchhuah a siam ang bawkin, Canada pawhin India-a zin turte tan fimkhur tura thuchhuah an siam bawk a ni. India leh Canada-te hian insumdawn tawnna chungchanga inbiakna an neih mek pawh he buaina avang hian an titawp lailawk bawk.