SATHEE hmang ṭangkai turin state-te hriattir

23rd November, 2023

Ministry of Education leh IIT Kanpur te thawk dunin an siam, entrance exam hmachhawn tura inbuatsaihte tana a thlawna coaching kal theihna online portal; Self Assessment Test and Help for Entrance Exams (SATHEE) chu hmang ṭangkai turin state-te an hriattir.

Indian Institutes of Technology (IIT) leh engineering college dang atana Joint Entrance Examination (JEE) chu ni 45 hnuah neih a ni tawh dawn a, hetianga entrance exam atan hian SATHEE chu buatsaih a nih thu IIT-Kanpur Director, Prof. S. Ganesh chuan a sawi. "Mimalin coaching centre an din leh portal an buatsaihah chuan man chawi a ngai ṭhin a, mahse, SATHEE aṭang hi chuan zirlai exam turte'n a thlawnin inbuatsaihna atana an mamawhte an nei thei dawn a ni. Hei hian sum lama harsatna nei zirlai tam takte a pui dawn a ni," a ti. Prof. Ganesh chuan SATHEE-ah hian ni 45 awh tur crash course an kalpui tawh thu sawiin,"SATHEE-ah hian live bakah zirlai buatsaih tawh sa te, exam inbuatsaihna atana zirlai kalpui dan tur inhrilhna leh zirlai inhrilh fiahna session te kalpui a ni dawn bawk a, hei hi zirlaite'n anmahni in-test nan an hmang thei dawn a ni," tiin a sawi bawk.

Tun dinhmunah hian Kendriya Vidyalayas, Navodaya Vidyalayas leh Central Board of School Education (CBSE) hnuaia sikul eng emaw zat aṭangin zirlai 5,000 vel chu SATHEE-ah hian an inziak lut tawh a, Ministry of Education chuan zirlai 10,000 tal neih chu an tum hmasa niin an sawi.

SATHEE-ah hian IIT zirlai leh professor te bakah All India Institute of Medical Sciences (AIIMS) te'n zirtirna an pe lai video hrang hrang dah khawm a ni a, nakkum May thlaa National Eligibility Cum Entrance Test (NEET) atana inbuatsaihte puitu dah thuai an tum bawk. Ṭawng chi li; English, Hindi, Odia leh Telugu tein material dah a ni a, Bengali bakah ṭawng chi 13 danga dah chhunzawm tum a ni. Official-te chuan National Council of Educational Research Institute (NCERT) syllabus topic hrang hrang zirtirna video pawh nakkum January leh February velah chuan dah an tum thu sawiin, thingtlang lama zirlai, JEE leh NEET exam pek tumte tana zau zawka hmalak zel an tum bawk a ni.