Telangana inthlanah a vawi khat nan in aṭangin vote thlak

Telangana chuan a ṭum khat nan inthlanah in aṭanga vote thlakna an kalpui a, hei hi kum upa tawh, kum 80 leh a chung lamte tana ruahmanna niin, district 33-a hmun tam zawkah chuan kalpui a ni tawh a, November 26 hian vote thlak zawh hman an beisei.

Telangana chief electoral officer, Vikas chuan."In aṭanga vote thlak theihna hi kan kalpui mek a, district tam zawkah chuan nimin aṭang khan neih ṭan a ni. Kalpui a la nih lohna hmunah pawh hman a nih theih nan hmalak zel a ni a, November 26-ah chuan zawh vek theih kan beisei. In lam aṭanga vote thlak tawhte chuan an lawm thu leh thuneitute leh Election Commission chunga an ruahmanna siam avanga an lawm thu an sawi," tiin a tarlang.Vikas Raj hian Thawhlehni khan Greater Hyderabad Municipal Corporation commissioner bakah, district election officer leh returning officer te zawng zawng nen vote thlakna hmun dinhmun chungchang thlir letna an neih thu a tarlang bawk. Meeting-ah hian CEO Vikas hian pianphunga rualban lo leh kum upa te tana buatsaih, polling station aia in aṭanga vote thlak duhte'n an duh dan anga an kalpui tak, in aṭanga vote thlak chu a ennawnpui a ni.

Telangana hi November 30-ah an inthlang dawn a, vote nei thar nuai 343.96 te voter ID print tur an nei a, heng zingah hian nuai 40.72 chu an peih tawh. Voter ID print hi naktukah chuan zawh hman an beisei a ni. Vikas chuan voter ID nuai 27 chu Department of Post kaltlangin voter-te hnen a thleng tawh a, a dang zawng pawh hi tun aṭanga ni nga chhunga pek fel vek hman an tum tih a sawi.