Ramria inkahnaah sipai 2 leh officer 2 thi

Jammu & Kashmir-a Rajouri district-a firfiak awmte dapa beihpuithlaknaah Indian army captain pahnih leh sipai pathumin nunna an chan.

Jammu-a awm, army thupuangtu chuan Rajouri district-ah firfiak biru an awm tih thu an dawn avangin firfiakte zawng chhuak tura beihpuithlakna hi November 19 khan an kalpui ṭan thu sawiin, Nilaini tlai khan firfiakte nena innangchingin inkahna a thleng a, he inkahnaah hian army officer pahnih leh sipai pathum an thi a ni, a ti.

"Firfiakte pawh hliam an awm a, tunah hian kan hual bet tawh a, anmahni man tum hian hma kan la mek a ni. Indian army-in tihdan phunga kan lo neih tawh angin, heng sipai huaisen tak tak, nunna hial chante awm karah hian hmeichhia leh naupangte'n hliam an tawrh loh dan tur berin beihpuithlakna hi kan kalpui a ni,"tiin a sawi.

Army-te'n firfiak an zawn hi Baji Maal chheh velah an va hmu a, an inkahna hmun hi Pir Panjal valley chhunga Gulabgarh ramhnuaiah a ni a, inkahnaah hian army para force te pawh an tel a ni. Firfiakte hi an hual bet mek niin an sawi a, an tlanchhiat lohna turin an hual vek niin an sawi bawk. Baji Maal-ah hian nimin khan army-te hian firfiak zinga mi, Lashkar-e-Taiba (LeT) mi leh sa ni ngeia hriat ruang an hmuh thu an puang a, ruang an chhar hi Pakistan mi, Improvised Explosive Device (IED) thiam bik niin an tarlang. Indian Army-te hian firfiakte zawn beihpui an thlak hi an la chhunzawm rih zel dawn niin an sawi.