Bihar-in quota a tihsanna 9th schedule-a dah turin phût

Bihar sorkar chuan state sorkar hnuaia hna lak leh zirna ina dinhmun chhe zawkte tana quota siam, 50% ni ṭhin chu 65%-a a tihsan hnuah quota tihsanna chu India constitution 9th schedule-ah dah turin sorkar laipui an nawr.

Bihar sorkar hian November thla tir khan SC, ST, OBC leh EBC te tana sorkar hna leh zirna ina quota an neih zat tihsanna bill a pass tawh a, he bill hi governor Rajendra Vishwanath Arlekar pawhin a pawmpui tawh bawk.

Bill pass takte hi Bihar Reservation of Vacancies in Posts and Services Amendment Bill leh Bihar Reservation (Admission In Educational Institutions) Amendment Bill tih a ni a, he bill hian SC tana reservation chu 20%-ah tisangin, ST tana reservation chu 2%-ah a tisang bawk a, OBC reservation chu 18%-ah tisangin, EWC tana reservation siam pawh 25%-ah a tisang bawk a ni. Heti hian bill hmanga reservation siam zawng zawng zat hi 65% a tling. Hetih lai hian Supreme Court chuan kum 1992 khan hnam hnuaihnungte tana reservation siam zat hi 50% aia tam tur a nih loh thu a lo sawi tawh a ni.

Bihar cabinet hian quota tihsanna 9th schedule-a dah tura sorkar laipui an nawr bakah hian sorkar hnathawkte dearness allowance chu 4%-a an tihpun thu an sawi bawk a, additional chief secretary, S Siddharth chuan sorkar hnathawkte'n kumin July 1 aṭanga chhiar ṭanin DA 46% an lak tur thu a sawi. Siddharth hian state sorkar chu tun dinhmuna an thil tawn mek ngaihtuahin, quota tihsanna India constitution 9th schedule-a dah tel chu dinhmun chhe zawk leh rethei zawkte tana rorelna dik pekna tur hmanrua a nih thu a sawi bawk. Sorkar hnathawkte DA punna hi July 1, 2023 aṭanga chhiar ṭan tur a ni a, hei vang hian DA a pek tur zawng zawng nen state sorkar hian Rs. vbc 966 a sen belh a ngai dawn niin Siddharth chuan a tarlang.