BMS-in OPS hmang leh turin ngen

Central leh state sorkar hnuaia hnathawk hrang hrangte telna, Government Employees National Confederation (GENC) chuan New Delhi-ah nawrh huaihawtin, Old Pension Scheme (OPS) hman leh an phut tih an sawi. GNEC hi Sangh Parivar hnuaia trade union, Bharatiya Mazdoor Sangh (BMS) industrial unit a ni.

Nawr huaihawt zinga mi ṭhenkhat hian union finance minister Nirmala Sitharaman pawh kawmin memorandum an theh lut bawk a, New Pension Scheme (NPS) hmang sorkar hnathawk mekte zingah lungawi lohna a tam thu leh, lungngai taka hun hmang an tam thu an hrilh bawk.

GNEC hruaitute chuan OPS chu basic pay an lak hnuhnun ber aṭanga 50% an lak chhunzawmna leh pension hlawh a ni tih an hriat chian thil a nih thu sawiin, Central Pay Commission kaltlanga dearness allowance awm leh a ṭul huna hlawh pawh ennawn ṭhin a nih thu an sawi. OPS phuta nawrh huaihawtnaa telte hi Defence, Railway, Postal leh central sorkar hnuaia EPFO leh Archaeological Survey of India vela thawkte an ni.

GNEC general secretary, Sadhu Singh chuan OPS chu tihtawp a, NPS hman a nih dawn lai pawhin BMS chuan ṭha an tih loh thu a sawi a, NPS chu thil chiang lo, market awm dan a zira pension hlawh tur pawisa thawh khawm hmanga kal mai mai a ni, a ti. "January 1, 2004 hma lam kha chuan OPS hmangin, pawisa thawh pawh ngai loin pension hlawh lak ngei ngei tur awm si kha kan nei a, khami bakah khan dearness allowance pawh zawm ve vekin, thil man san dan a zir zela tihtam ve theih a ni. Heng zawng zawng hi titawp a, ram tana ṭha zawk tur anga sawia NPS min hmantirtu sorkar hi a tuartute hian NPS hi hlip a, OPS hmang leh turin kan phut tak meuh a ni," tiin memorandum-ah an tarlang.

Finance Minister kawmtu GNEC aiawhte chuan state sorkar tam takin NPS chu an hnawl thu leh OPS an hman chhunzawm thu hrilh bawkin, chu chuan state ṭhenkhat leh central sorkar hnuaia thawk, NPS la hmangteah beiseina a siam thu te, an beisei anga sorkarin a ngaihsak si loh avangin lungawi lohna nasa tak a awm mek thu an sawi.