Vawiinah Rajasthan inthlang dawn

Election Commission of India (ECI)-in ruahmanna a lo siam tawh angin Rajasthan state assembly inthlan chu vawiinah neih a ni dawn.

Rajasthan-ah hian constituency 200 awmin, kumin inthlanah hian candidate 1,875-in an chuh dawn niin Rajasthan Election Watch chuan a tarlang. Candidate 688 te hi national party mi niin, candidate 105 te hi state party an ni bawk a, independent-a chuh tur candidate 734 awm in, registered unrecognized party atangin candidate 348 an awm bawk a ni.

Candidate-te sum leh pai dinhmun : Kum 2023 Rajasthan assembly candidate 1,875 zinga 651 hi crorepati an ni a, hei hi 35% a tling. Kum 2018 inthlanah khan crorepati awm zat hi 27% a ni thung. Candidate-te assets neih zawng zawng chawhrualin mi pakhatin Rs. vbc 3.12 hu zel nei ang a ni.

Party zingah BJP-in crorepati candidate ngah berin, candidate 200 an neih zinga 176 te chu crorepati an ni a, Congress-in dawtin, candidate 199 zinga 167-te chu crorepati an ni. Tualṭo party BSP candidate 185 zinga 36 te chu crorepati an ni bawk. Candidate zinga hausa ber chu Churu constituency-a ding, Congress party candidate, Rafique Mandella niin, a hausakna belh khawm hi Rs. vbc 166 chuang a ni. Hetih lai hian candidate neih engmah nei lo hi pariat an awm a, Nimbahera leh Karauli district-a ding tur, Labh Chandra Kumhar leh Kusum Lata te chuan cheng 500 chauh an nei niin an affidavit-ah an tarlang.

Zirna leh kum dinhmun : Candidate 1,875 zinga 774 te chuan pawl 5 aṭanga pawl 12 inkar angin an intarlang a, candidate 916 te chu graduate leh a chung lam thiamna nei niin an affidavit-ah tarlan a ni thung, hei hi za zela 49% a tling pha a ni. Candidate 37 te chu diploma nei an ni a, candidate 137 te chu ziak leh chhiar thiam tawp niin, candidate 11 te chu ziak leh chhiar thiam lo an ni bawk. Rajasthan assembly candidate zingah hian kum 80 chung lam pariat an awm a, kum 25-40 inkar hi 643 awmin, candidate tam ber, 868 (46%)-te hi kum 41-60 an ni thung. Kum 61-80 inkar hi candidate 356 an awm bawk a ni.

Candidate thubuai nei : Kumin Rajasthan assembly inthlan candidate zinga 326 te hi thubuai nei an ni a, heng zinga 236 te chu thubuai rip tak nei an ni bawk. Party angin BJP-in thubuai nei lai candidate an ngah ber a, candidate 61 zetin thubuai an nei. Congress party candidate 199 zinga 47 leh, BSP candidate zinga 12-in thubuai an nei a, AAP candidate 18, Rashtriya Loktantrik Party candidate 28, CPI(M) candidate 13 leh Bhartiya Tribal Party 2 te chu thubuai nei lai an ni bawk.

Kumin Rajasthan assembly inthlanah hian candidate 1,875 aṭangin hmeichhe candidate 183 an awm a, heng zinga 66 hi independent candidate an ni. Congress-in hmeichhe candidate 28 neiin, BSP-in hmeichhe candidate 22 an nei.

Constituency zingah Jaipur seat aṭanga chuh tur an tam ber a, candidate 199 zetin an chuh dawn a ni. Hetih lai hian Sriganganagar Karanpur seat-ah erawh Congress candidate thihna avangin vote thlak a ni dawn lo a, constituency 199-ah vote thlak a ni rih dawn a ni. Constituency 199-ah hian voter 5,25,38,105 an awm a ni.