Union Minister-in Bihar-ah halal chuanna khap a phût

Union rural development minister, Giriraj Singh chuan Bihar chief minister Nitish Kumar chu Bihar chhunga halal chuanna thilte khapna siam tura a phut thu a sawi. Union Minister hian halal pawmpuina siam chu sumdawnnaa sakhaw tih len tumna a ni, a ti.

Giriraj Singh hian Chief Minister hnenah lehkha thawnin, he a lehkha thawn hi X-ah a post zui bawk a ni."Halal pawmpui awm thil siam leh zawrh hi medieval hunlaia Muslim ni lote hnena Jizya chhiah chawitir nen a inang reng a ni. Sorkar hmasa leh Congress ngei pawh khan he thil an dodal loh chhan chu intih lawmna leh vote zawnna politics an khelh vang a ni," tiin video a siamah Singh hian a sawi chhuak.

Singh-a'n a sawi zelnaah chuan Bihar kil tin leh thler tina halal chuanna thilte zawrh a nih theih chhan chu 'tukde tukde gang' vang a nih thu leh, halal pawmpuina chuang tur chuan Quran hminga tihthianghlim a ngaih thu a sawi. Halal khapna awm lo thil zawrh chhuah chuan Sharia rorelna a hring dawn a ni, a ti. Union minister hian Nitish Kumar chu Uttar Pradesh chief minister, Yogi Adityanath sorkar tihdan entawn a ti ve turin a hrilh bawk.

Hemi chungchangah Bihar CM Nitish Kumar hian BJP MP chu chhang letin, bawng sa ei chungchang ang maia pawn lang maia ṭhat tumna a ni, a ti. JD(U) thupuangtu, Neeraj Kumar chuan,"BJP te hian Shantana Dharma chhawm leh vawng nungtu ber angin inchhal mah se, an hruaitu zinga mi, Uttar Pradesh-a mite ngei pawh hi bawng sa thawn chhuak hnem ber an ni, hei hi pawn lang taka ṭhat an tumna mai a ni," tiin a sawi ve bawk.